ავსტრიაში, ქალაქ ბრაუნაუ-ამ-ინში, ადოლფ ჰიტლერის დაბადების სახლში პოლიციის განყოფილება გაიხსნა. ხელისუფლება იმედოვნებს, რომ ამ გადაწყვეტილებით შენობას ნეონაცისტების „მომლოცველობის ადგილად“ გამოყენებას შეუშლის ხელს.

შენობაში ნარკოტიკებით უკანონო ვაჭრობის წინააღმდეგ მებრძოლი სპეციალიზებული პოლიციის დანაყოფი იმუშავებს. გერმანიის საზღვართან სიახლოვის გამო, აღნიშნული ტერიტორია ნარკოტიკების ტრანზიტის ერთ-ერთ მნიშვნელოვან მარშრუტად ითვლება.

შენობის გადაკეთება დაახლოებით 20 მილიონი ევრო დაჯდა. ავსტრიის შინაგან საქმეთა მინისტრმა გერჰარდ კარნერმა განაცხადა, რომ ამიერიდან ადგილი დემოკრატიის, კანონის უზენაესობისა და უსაფრთხოების სიმბოლო გახდება, თუმცა მისი ისტორიული წარსული დავიწყებას არ მიეცემა.

წლების განმავლობაში შენობას ნეონაცისტები სტუმრობდნენ, ჰიტლერის დაბადების დღეს ყვავილებს ტოვებდნენ და აკრძალული ნაცისტური ჟესტებით ფოტოებს იღებდნენ. ადგილობრივები მას ხშირად „ბოროტების სახლს“ უწოდებდნენ.

ექსპერტები შენობაში მუზეუმის მოწყობას ეწინააღმდეგებოდნენ, რადგან ეს შესაძლოა მემარჯვენე ექსტრემისტების ინტერესს კიდევ უფრო გაზრდიდა. შენობის დანგრევაც მიუღებლად ჩაითვალა, რადგან ისტორიის მნიშვნელოვანი ნაწილის წაშლას გამოიწვევდა.

ჰიტლერი ამ შენობაში 1889 წლის 20 აპრილს დაიბადა და იქ სიცოცხლის მხოლოდ პირველი რამდენიმე კვირა გაატარა.