საქართველოში დედის რძის პირველი ბანკი გაიხსნა. ის ბათუმში, იაშვილის სახელობის დედათა და ბავშვთა ცენტრალურ ჰოსპიტალში ამოქმედდა და პირველ ეტაპზე აჭარაში დაბადებულ დღენაკლულ ახალშობილებს მოემსახურება.
დონორის რძე ჩვილებს მხოლოდ ექიმის დანიშნულებითა და სამედიცინო ჩვენების საფუძველზე მიეწოდებათ. რძე გადის მკაცრ შემოწმებას, ბაქტერიოლოგიურ კვლევასა და პასტერიზაციას, რის შემდეგაც სპეციალურ პირობებში ინახება.
ბანკის პირველი დონორი სამი შვილის დედა, ხათუნა ფაღავაა, რომელმაც უკვე ხუთი ლიტრი რძე ჩააბარა. დონაცია უანგაროა და სოციალური პასუხისმგებლობის პრინციპს ეფუძნება.
პროექტის ავტორების განცხადებით, მომავალში დედის რძის კიდევ ერთი ბანკის გახსნა თბილისშიც იგეგმება, რომელიც აღმოსავლეთ საქართველოს მოემსახურება.
