საფრანგეთში ივნისის ძლიერი სიცხის პერიოდში 5 764-ზე მეტი ადამიანი გარდაიცვალა. ქვეყნის საზოგადოებრივი ჯანმრთელობის სააგენტოს მონაცემებით, შემთხვევები 17 ივნისიდან 2 ივლისამდე პერიოდში დაფიქსირდა, ხოლო ჭარბმა სიკვდილიანობამ 36% შეადგინა.

გარდაცვალების შემთხვევების ნახევარზე მეტი 25-27 ივნისზე მოდის. ჭარბი სიკვდილიანობის დაახლოებით ორი მესამედი 75 წელს გადაცილებულ ადამიანებში დაფიქსირდა. სააგენტოს განმარტებით, სიკვდილის კონკრეტული მიზეზები ჯერ დადგენილი არ არის და შემთხვევების სიცხესთან პირდაპირი კავშირი ამ ეტაპზე ოფიციალურად არ დასტურდება.

შედარებისთვის, გასული წლის მთელი ზაფხულის განმავლობაში საფრანგეთში 5 722 ჭარბი სიკვდილი დაფიქსირდა.

ამავე დროს, უკიდურეს სიცხესა და ხანძრებს ებრძვიან ესპანეთშიც. მადრიდის ჩრდილოეთით, გვადალახარის რეგიონში გაჩენილმა ხანძარმა დაახლოებით 32 000 ჰექტარი მოიცვა. 34 დასახლებიდან 1 200 ადამიანის ევაკუაცია გახდა საჭირო, კიდევ 14 სოფელში კი მოსახლეობას სახლებში დარჩენა დაევალა.

ესპანეთის პრემიერ-მინისტრ პედრო სანჩესის განცხადებით, მიმდინარე წელს ქვეყანაში უკვე 22 მასშტაბური ტყის ხანძარი დაფიქსირდა, რაც გასული წლის ანალოგიურ მაჩვენებელს ოთხჯერ აღემატება. ხანძრებმა 100 000 ჰექტარზე მეტი ტერიტორია გაანადგურა, რაც ბოლო ათწლეულის საშუალო წლიურ მაჩვენებელს უტოლდება.

ესპანეთის მეტეოროლოგიური სააგენტოს ცნობით, ტყის ხანძრების საფრთხე კვლავ ძალიან მაღალი ან უკიდურესია. ქვეყნის ზოგიერთ ნაწილში ტემპერატურა 42-44 გრადუსს აღწევს.

ევროპა მსოფლიოში ყველაზე სწრაფად დათბობადი კონტინენტია. მეცნიერების შეფასებით, ადამიანის საქმიანობით გამოწვეული კლიმატის ცვლილება სიცხის ტალღებს, გვალვებსა და ტყის ხანძრებს უფრო ხშირ და ინტენსიურ მოვლენებად აქცევს.