მარნეულში, სავარაუდოდ, 13 წლის ბავშვმა იმშობიარა. მომხდარზე პოლიციამ გამოძიება დაიწყო.
ინფორმაცია იმის შესახებ, რომ ბავშვმა ტყუპი გააჩინა, 1 ოქტომბერს მარნეულელმა აქტივისტმა სამირა ბაირამოვამ გაავრცელა. მისი წყაროს ინფორმაციით, ერთ-ერთი ახალშობილი გარდაიცვალა, მეორის მდგომარეობა კი მძიმეა.
შინაგან საქმეთა სამინისტროში რადიო თავისუფლებას განუცხადეს, რომ გამოძიება სისხლის სამართლის კოდექსის 140-ე მუხლის პირველი ნაწილით მიმდინარეობს.
აღნიშნული მუხლი სრულწლოვნის მიერ 16 წელს მიუღწეველ პირთან სექსუალური ხასიათის შეღწევას ეხება და 7-დან 9 წლამდე თავისუფლების აღკვეთას ითვალისწინებს.
ამ ეტაპზე უცნობია, ვინ არის სავარაუდო დამნაშავე და დაკავებულია თუ არა ვინმე. უწყებას სხვა დეტალები არ გაუვრცელებია.
რადიო თავისუფლების ცნობით, საქართველოში ბავშვების მიმართ სექსუალური ძალადობის შემთხვევები ხშირია. სახელმწიფო ზრუნვის სააგენტოს მონაცემებით, მხოლოდ 2022 წლის პირველ რვა თვეში, თბილისის მასშტაბით, სექსუალური ძალადობის მსხვერპლ ბავშვთა ფსიქოლოგიურ-სოციალური მომსახურების ცენტრმა 80 ბავშვს გაუწია დახმარება.
