კალიფორნიაში ზაფხულის ბოლოსა და შემოდგომის დასაწყისში შავი დათვები განსაკუთრებით აქტიურდებიან. ზამთრის ძილის წინ ისინი მეტი საკვების მიღებას ცდილობენ და ბუნებრივ საკვებთან ერთად სულ უფრო ხშირად იზიდავთ ადამიანების მიერ დატოვებული ნარჩენები, ხეხილი, შინაური ცხოველების საკვები და საცხოვრებელი სახლების ეზოები.

ეს პრობლემა უკვე ლოს-ანჯელესის გარეუბნებშიც შეინიშნება. ქალაქის გაფართოებასთან ერთად საცხოვრებელი უბნები სულ უფრო უახლოვდება ბუნებრივ გარემოს, რის გამოც დათვები ადამიანებთან უფრო ხშირად ხვდებიან.

კალიფორნიაში, სპეციალისტების შეფასებით, 50 000-დან 70 000-მდე შავი დათვი ბინადრობს. რამდენიმე ასეული მათგანი Angeles National Forest-ში ცხოვრობს, რომელიც ლოს-ანჯელესის ჩრდილოეთით მდებარეობს.

ერთ-ერთი ასეთი ადგილია ქალაქი მონროვია. ადგილობრივ მცხოვრებ ბრაიან გორდონსა და მის პარტნიორს საკუთარ აუზში დათვების ოჯახის სტუმრობა თითქმის ჩვეულებრივ მოვლენად ექცათ. ისინი ცხოველების ვიდეოებს სოციალურ ქსელშიც აქვეყნებენ, თუმცა ხაზს უსვამენ, რომ დათვებთან უსაფრთხო თანაცხოვრებისთვის აუცილებელია მათთვის საკვების ხელმისაწვდომობის მაქსიმალურად შეზღუდვა.

სპეციალისტები მოსახლეობას ურჩევენ, გარეთ არ დატოვონ შინაური ცხოველების საკვები, ნაგვის ურნები მჭიდროდ დახურონ და ხეებიდან ჩამოცვენილი ხილი დროულად მოაგროვონ. აუზები, თევზის პატარა ტბორები და ხეხილიც კი დათვებისთვის მიმზიდველი შეიძლება გახდეს.

ადამიანების საკვები მათთვის განსაკუთრებით საინტერესოა, რადგან მცირე რაოდენობაშიც გაცილებით მეტ კალორიას შეიცავს, ვიდრე ბუნებრივ გარემოში მოსაპოვებელი საკვები.

ვითარებაზე გავლენას კლიმატის ცვლილებაც ახდენს. მაღალი ტემპერატურა და ძლიერი ტყის ხანძრები ბუნებრივი საკვების რაოდენობას ამცირებს და დათვებს უფრო ფართო ტერიტორიებზე გადაადგილებას აიძულებს.

კალიფორნიის თევზისა და ველური ბუნების დეპარტამენტის ინფორმაციით, ადამიანებსა და დათვებს შორის შეხვედრები ყველაზე ხშირად ზაფხულის ბოლოსა და შემოდგომის დასაწყისში ფიქსირდება. 2026 წელი კი ასეთი შემთხვევების რაოდენობით შესაძლოა რეკორდული გახდეს.

კონფლიქტი ზოგჯერ ცხოველის სხვა ტერიტორიაზე გადაყვანით ან უკიდურეს შემთხვევაში მისი ევთანაზიით სრულდება. სპეციალისტების თქმით, მსგავსი შემთხვევების დიდი ნაწილის თავიდან აცილება შესაძლებელია, თუ ადამიანები დათვებისთვის საკვების წყაროებს არ შექმნიან და მათ უსაფრთხო დისტანციას დაუტოვებენ.

ექსპერტები ასევე აფრთხილებენ, რომ სოციალურ ქსელებში გავრცელებულმა საყვარელმა ვიდეოებმა შესაძლოა დათვების მიმართ თანაგრძნობა გაზარდოს, თუმცა არ უნდა შექმნას შთაბეჭდილება, რომ ისინი შინაური ცხოველები არიან.

ლოს-ანჯელესის გარეუბნებში მცხოვრებთათვის შავი დათვები უკვე იმ ველური ბუნების ნაწილია, რომელთანაც ქალაქის ზრდის ფონზე თანაცხოვრების სწავლა უწევთ.