პრინცესა დიანას ერთ-ერთი ყველაზე ცნობილი სამოსი, ე.წ. „შურისძიების კაბა“, თითქმის 30 წლის შემდეგ პირველად გაიყიდება. Sotheby’s-ის აუქციონი 9 დეკემბერს ნიუ-იორკში გაიმართება, კაბის სავარაუდო ღირებულება კი $150 000-დან $300 000-მდეა.

შავი, მხრებგაშიშვლებული კაბა ბერძენმა დიზაინერმა Christina Stambolian-მა შექმნა. დიანამ ის 1994 წლის 29 ივნისს, ლონდონის Serpentine Gallery-ში გამართულ ღონისძიებაზე ჩაიცვა.

იმავე დღეს ტელევიზიით გადაიცა დოკუმენტური ფილმი, რომელშიც მისმა მაშინდელმა მეუღლემ, პრინცმა ჩარლზმა, რომელიც ახლა მეფე ჩარლზ III-ია, ქორწინებაში ღალატი აღიარა. დიანას თამამი გამოჩენა მალევე იქცა პოპკულტურის ერთ-ერთ ყველაზე ცნობილ მომენტად და კაბას „შურისძიების კაბა“ შეარქვეს.

კაბა სამეფო ჩაცმის იმდროინდელ დაუწერელ წესებსაც არღვევდა. შავი ფერი სამეფო ოჯახის წევრებისთვის ძირითადად გლოვასთან ასოცირდებოდა, ხოლო თავად კაბის დიზაინი დიანას ჩვეულებრივ უფრო კონსერვატიულ სტილს მკვეთრად განსხვავდებოდა.

დიანას კაბა შეძენილი ჰქონდა, თუმცა დაახლოებით სამი წლის განმავლობაში არ ეცვა, რადგან დიზაინერის თქმით, მას ზედმეტად თამამად მიიჩნევდა.

1997 წელს დიანამ ეს და კიდევ 78 კაბა საქველმოქმედო აუქციონზე გაიტანა, რომლის შემოსავალიც ძუძუს კიბოსა და შიდსთან დაკავშირებულ ორგანიზაციებს მოხმარდა. „შურისძიების კაბა“ სწორედ მაშინ გაიყიდა ბოლოს.

ახლა კაბა კვლავ Sotheby’s-ის აუქციონზე ბრუნდება. ნიუ-იორკამდე ის ლონდონში, ჰონგ-კონგსა და ჟენევაში გამოიფინება. ლონდონში კაბის ნახვა 18-დან 24 სექტემბრამდეა შესაძლებელი.

აუქციონის სახლის ინფორმაციით, გაყიდვიდან მიღებული თანხის ნაწილი NHS Lothian Charity-ს გადაეცემა.