Swatch-ისა და შვეიცარიული ფუფუნების ბრენდის Audemars Piguet-ის ერთობლივმა კოლექციამ Royal Pop მსოფლიოს სხვადასხვა ქალაქში დიდი აჟიოტაჟი გამოიწვია. პარიზიდან კუალა-ლუმპურამდე Swatch-ის მაღაზიებთან გრძელი რიგები გაჩნდა, რამდენიმე ადგილზე კი ხალხის დიდი ნაკადის გამო მაღაზიების დროებით დახურვაც გახდა საჭირო.
Royal Pop რვა სხვადასხვა ფერის ჯიბის საათს აერთიანებს. დიზაინი Audemars Piguet-ის ცნობილ Royal Oak-სა და 1980-იანი წლების Swatch POP-ის სტილს ეფუძნება. საათები მაჯის სამაჯურის ნაცვლად სპეციალური თასმით იყიდება და მათი ტარება კისერზე, ჩანთაზე ან სხვა ფორმით არის შესაძლებელი.
კოლექციის ფასი მოდელის მიხედვით $400 ან $420-ია. შედარებისთვის, Audemars Piguet-ის Royal Oak-ის საათების ღირებულება ჩვეულებრივ ათობით ათასი დოლარიდან იწყება.
მაღალი მოთხოვნის ფონზე Royal Pop-ის საათები თითქმის მაშინვე გამოჩნდა მეორად ბაზარზეც, სადაც ზოგიერთი მათგანი თავდაპირველ ფასზე რამდენჯერმე ძვირად იყიდებოდა.
მაღაზიებთან ვითარება რამდენიმე ქვეყანაში დაიძაბა. გავრცელებულ ვიდეოებში ჩანს ჩხუბი და უსაფრთხოების თანამშრომლების მცდელობა, შეეკავებინათ დიდი რაოდენობით შეკრებილი მომხმარებლები. აშშ-ში უსაფრთხოების მიზეზით Swatch-ის 19 მაღაზია დაიხურა, ხოლო ზოგიერთი ევროპული მაღაზიაც დროებით შეწყვიტა მუშაობა.
Swatch-მა მოგვიანებით მომხმარებლებს მოუწოდა, მაღაზიებთან დიდი რაოდენობით არ შეკრებილიყვნენ. კომპანიის განცხადებით, Royal Pop რამდენიმე თვის განმავლობაში დარჩება გაყიდვაში და პროდუქტის შეძენაზე ერთი ადამიანისთვის დღიური ლიმიტიც მოქმედებს.
თანამშრომლობა ორივე ბრენდისთვის განსხვავებულ შესაძლებლობას ქმნის. Swatch ძვირადღირებულ საათებთან ასოცირებულ ბრენდთან თანამშრომლობით დამატებით ყურადღებას იღებს, Audemars Piguet-ს კი საშუალება ეძლევა, უფრო ახალგაზრდა და ფართო აუდიტორიამდე მივიდეს.
ამავე დროს, საათების მოყვარულთა ნაწილში გაჩნდა დისკუსია, ხომ არ აზიანებს შედარებით იაფფასიან პროდუქტთან თანამშრომლობა Audemars Piguet-ის ექსკლუზიურ იმიჯს.
თავად კომპანიები Royal Pop-ს ორი შვეიცარიული ბრენდის განსხვავებული სამყაროს გაერთიანებად აღწერენ.
