ცნობილი ქალების გარეგნობასა და სავარაუდო კოსმეტიკურ ჩარევებზე მსჯელობა წლების განმავლობაში ინტერნეტის ერთ-ერთი გავრცელებული თემა იყო, თუმცა ახლა მსგავსი ყურადღება სულ უფრო ხშირად კაც ვარსკვლავებზეც გადადის.
ამის მაგალითია 51 წლის Leonardo DiCaprio, რომლის გარეგნობაც წლევანდელი „ოსკარების“ შემდეგ სოციალურ ქსელებში აქტიურად განიხილებოდა. მომხმარებლებისა და კოსმეტიკური ქირურგების ნაწილი ვარაუდობდა, რომ მსახიობს შესაძლოა გარკვეული პროცედურები ჩაეტარებინა, თუმცა ამის დამადასტურებელი ინფორმაცია არ არსებობს.
რამდენიმე კვირით ადრე დიდი გამოხმაურება მოჰყვა 64 წლის Jim Carrey-ის გამოჩენას César Awards-ზე. მისი შეცვლილი გარეგნობის გამო სოციალურ ქსელებში პლასტიკურ ჩარევებზე სპეკულაციებიც გავრცელდა.
მსგავსი განხილვების ობიექტები გახდნენ Bradley Cooper, Ryan Gosling და Barry Keoghan-იც. Cooper-მა პლასტიკური ოპერაციის ჩატარება უარყო, ხოლო Keoghan-მა განაცხადა, რომ მის გარეგნობაზე ონლაინ შეურაცხყოფა იმდენად მძიმე გახდა, რომ ზოგჯერ სახლიდან გასვლაც აღარ სურს.
ამავე დროს, კოსმეტიკური პროცედურებით კაცების დაინტერესება რეალურად იზრდება. ბრიტანეთის ესთეტიკური პლასტიკური ქირურგების ასოციაციის მონაცემებით, კაცებზე ქვეყანაში ჩატარებული კოსმეტიკური ოპერაციების 6.5% მოდის, ხოლო სახისა და კისრის ლიფტინგის რაოდენობა 2023-დან 2024 წლამდე 26%-ით გაიზარდა.
ექსპერტები ტენდენციას სოციალურ ქსელებს, ვიდეოკონფერენციებსა და გარეგნობაზე ორიენტირებულ ონლაინკულტურას უკავშირებენ.
მათი შეფასებით, ცვლილებას მეორე მხარეც აქვს: თუ წარსულში მამაკაც ვარსკვლავებს ასაკის ბუნებრივად გამოჩენას უფრო ადვილად პატიობდნენ, ახლა მათზეც სულ უფრო ხშირად ვრცელდება ის ზეწოლა, რომელსაც ცნობილი ქალები დიდი ხანია აწყდებიან.
ექსპერტები აფრთხილებენ, რომ ამან შესაძლოა ახალგაზრდობისა და „იდეალური“ გარეგნობის მიმართ საზოგადოების ისედაც ძლიერი დამოკიდებულება კიდევ უფრო გააღრმაოს და დაბერება ბუნებრივი პროცესის ნაცვლად პრობლემად წარმოაჩინოს.
