სინგაპურში ერთ-ერთი ყველაზე მასშტაბური ფულის გათეთრების საქმის ფარგლებში ჩამორთმეული ძვირადღირებული ნივთების გაყიდვა დაიწყო. აუქციონებზე ასობით ჩანთა, სამკაული, საათი და სხვა ნივთი გაიყიდება, მათ შორის Hermès-ის, Chanel-ისა და Louis Vuitton-ის პროდუქცია.
საქმე 2023 წელს ჩატარებულ მასშტაბურ პოლიციურ ოპერაციას უკავშირდება, რომელშიც 400-ზე მეტი სამართალდამცველი მონაწილეობდა. გამოძიების ფარგლებში 3 მილიარდზე მეტი სინგაპურული დოლარის, დაახლოებით $2.4 მილიარდის ღირებულების აქტივები დაყადაღდა ან მათი განკარგვა შეიზღუდა. მათ შორის იყო ნაღდი ფული, კრიპტოვალუტა, ოქროს ზოდები, უძრავი ქონება, სპორტული ავტომობილები და ფუფუნების საგნები.
საქმეზე დაკავებული 10 პირი ფულის გათეთრებასა და სხვა დანაშაულებში დამნაშავედ ცნეს. მათ 13-დან 17 თვემდე პატიმრობა შეეფარდათ. სასჯელის მოხდის შემდეგ ყველა მათგანი სინგაპურიდან გააძევეს.
2025 წელს სინგაპურის პოლიციამ ჩამორთმეული არაფულადი აქტივების რეალიზება Deloitte-ს დაავალა. 2026 წლის სექტემბრიდან საჯარო გაყიდვებზე 80-ზე მეტი უძრავი ქონება და 1 000-ზე მეტი ძვირადღირებული ნივთი ეტაპობრივად გამოაქვთ. პროცესი 2027 წლის შუა პერიოდამდე გაგრძელდება.
ფუფუნების ნივთების გაყიდვას აუქციონის სახლი Hotlotz მართავს. კოლექციაში ასობით ჩანთა და სამკაულია, მათ შორის დაახლოებით 250 Hermès-ის ჩანთა. ნივთების რაოდენობის გამო გაყიდვები რამდენიმე ცალკეულ აუქციონად არის დაყოფილი.
ყველაზე ძვირად შეფასებულ ნივთებს შორისაა 15-კარატიანი ყვითელი ბრილიანტის ბეჭედი, რომლის ფასი, აუქციონის სახლის ვარაუდით, 300 000 სინგაპურულ დოლარამდე შეიძლება ავიდეს.
აუქციონებიდან მიღებული თანხა პირდაპირ სინგაპურის სახელმწიფო ხაზინაში გადაირიცხება.
