იტალიის მთავრობა სკოლებში სახის სრულად დამფარავი სამოსის აკრძალვასა და თითოეულ კლასში უცხოელი მოსწავლეების მაქსიმალური რაოდენობის განსაზღვრას გეგმავს. ამის შესახებ პრემიერ-მინისტრმა ჯორჯა მელონიმ კვირას, მისი პარტიის ახალგაზრდული ფრთის ყოველწლიურ შეხვედრაზე განაცხადა.

მელონის თქმით, შესაბამისი ინიციატივა მინისტრთა კაბინეტს მალე წარედგინება. დაგეგმილი ცვლილებები სკოლებში ბურკისა და ნიქაბის აკრძალვასაც ითვალისწინებს.

პრემიერ-მინისტრმა ასევე განაცხადა, რომ იმ უცხოელი მოსწავლეების მშობლებს, რომელთა შვილებსაც სასკოლო სისტემაში ინტეგრაციის მხრივ სერიოზული სირთულეები აქვთ, იტალიური ენის შესწავლა მოეთხოვებათ.

„თუ კლასში მხოლოდ ერთი ბავშვია, რომელსაც იტალიური არ ესმის, დიდი ალბათობით, თანაკლასელებისა და მასწავლებლების დახმარებით ენას სწრაფად ისწავლის და ინტეგრირდება. თუმცა, თუ იმ ბავშვების რაოდენობა, რომლებმაც ენა არ იციან, დიდი ხდება ან ისინი უმრავლესობას წარმოადგენენ, ეს უკვე ინტეგრაცია აღარ არის, ეს უყურადღებობაა“, - განაცხადა მელონიმ.

პრემიერ-მინისტრს არ დაუკონკრეტებია, კონკრეტულად რამდენი უცხოელი მოსწავლის სწავლა იქნება დაშვებული ერთ კლასში.

კვლევითი ორგანიზაცია Fondazione ISMU-ს მონაცემებით, იტალიის სკოლებში ჩარიცხული მოსწავლეების 11.6% იტალიის მოქალაქე არ არის, რაც დაახლოებით ყოველ 100 მოსწავლეზე 12 ბავშვს შეადგენს.

მელონიმ სკოლებში სახის დამფარავი სამოსის დაგეგმილ აკრძალვაზეც ისაუბრა.

„სკოლაში სახე დაფარული არ უნდა გქონდეს და იტალიაში ვერავინ გადაწყვეტს, რეალური თუ სავარაუდო ტრადიციის სახელით, რომ ახალგაზრდა ქალმა თავი უნდა დამალოს“, - განაცხადა მან.

იტალია ხმელთაშუა ზღვის ცენტრალურ ნაწილში მდებარეობის გამო ევროპაში მიგრანტების ერთ-ერთი მთავარი შესასვლელი ქვეყანაა. მიგრაციისა და ინტეგრაციის საკითხები წლების განმავლობაში ქვეყნის პოლიტიკური დებატების მნიშვნელოვანი თემაა, მათ შორის რელიგიური სიმბოლოების, მოქალაქეობის წესებისა და სასკოლო ინტეგრაციის მიმართულებით.