საფრანგეთში პარი სენ-ჟერმენის პრეზიდენტ ნასერ ალ-ხელაიფის წინააღმდეგ ინტერესთა კონფლიქტის ეჭვის საფუძველზე წინასწარი გამოძიება მიმდინარეობს. ინფორმაციას AFP პარიზის პროკურატურაზე დაყრდნობით ავრცელებს.
გამოძიების ერთ-ერთი მთავარი საკითხია ის, რომ ალ-ხელაიფი ერთდროულად ხელმძღვანელობს ჩემპიონთა ლიგის მოქმედ გამარჯვებულ კლუბ პარი სენ-ჟერმენს და მედიაჯგუფ „beIN Media Group“-ს.
საქმე უკავშირდება 2024 წლის ივლისში ფეხბურთის ლიგის წარმომადგენლებთან გამართულ შეხვედრას, რომელზეც მაუწყებლობის უფლებების საკითხი განიხილებოდა. პარიზის პროკურატურამ გამოძიების შესახებ ინფორმაცია სპორტული გამოცემა „L'Equipe“-ის მიერ გავრცელებული ცნობების შემდეგ დაადასტურა.
ალ-ხელაიფის ადვოკატმა AFP-ს განუცხადა, რომ მისი კლიენტი „ყოველთვის დამოუკიდებლად, მიუკერძოებლად და ობიექტურად მოქმედებდა“.
ალ-ხელაიფის წინააღმდეგ ეს გამოძიება აპრილში დაიწყო, მას შემდეგ, რაც შესაბამისმა უწყებებმა კორუფციასთან მებრძოლი ასოციაცია „Anticor“-ისგან ინფორმაცია მიიღეს. სამართალწარმოება კორუფციასთან ბრძოლისა და ფინანსურ პოლიციას დაევალა.
საქმესთან დაახლოებული წყაროს ინფორმაციით, ალ-ხელაიფს 2025 წლის თებერვალში ასევე წაუყენეს ბრალი უფლებამოსილების ბოროტად გამოყენებაში თანამონაწილეობის გამო. ეს საქმე ერთ-ერთ კომპანიაში აქციონერთა კენჭისყრას უკავშირდებოდა.
ნასერ ალ-ხელაიფის წინააღმდეგ წარსულშიც არსებობდა სამართლებრივი დავა. საქმე ეხებოდა სავარაუდო კორუფციას, რომელიც 2017 და 2019 წლების მძლეოსნობის მსოფლიო ჩემპიონატების მასპინძლობაზე კატარის განაცხადებს უკავშირდებოდა.
თუმცა ეს ბრალდებები საფრანგეთის საკასაციო სასამართლომ 2023 წლის თებერვალში საბოლოოდ გააუქმა. სასამართლომ დაადგინა, რომ საფრანგეთის მართლმსაჯულების სისტემას ალ-ხელაიფის სისხლისსამართლებრივი დევნის უფლება არ ჰქონდა.
ნასერ ალ-ხელაიფი პარი სენ-ჟერმენის მფლობელი არ არის. კლუბი, რომლის ერთ-ერთი წამყვანი ფეხბურთელი ხვიჩა კვარაცხელიაა, კატარის სპორტული ინვესტიციების უწყებას ეკუთვნის. ალ-ხელაიფი პსჟ-ის პრეზიდენტის თანამდებობას იკავებს.
