Google-ის ხელოვნური ინტელექტის მოდელმა Gemini-მ კიბერუსაფრთხოების შესაძლებლობების ტესტირებისას დამოუკიდებლად შეძლო სამი კომპანიის სისტემაში შეღწევა. Google-ის განცხადებით, ეს შესაძლოა პირველი ცნობილი შემთხვევა იყოს, როდესაც მისმა AI-მ მსგავსი მოქმედება ავტონომიურად განახორციელა.
Google-ის წარმომადგენელმა BBC-ს განუცხადა, რომ Gemini-მ ინტერნეტში საჯაროდ ხელმისაწვდომი ინფორმაცია მოიძია და შემდეგ ვებგვერდებზე შესასვლელი მონაცემები გამოიცნო. მოდელს ეგონა, რომ ეს საიტები ტესტირების გარემოს ნაწილი იყო.
Google-ის წარმომადგენლის თქმით, სამივე შემთხვევაში „მოდელი გაჩერდა“ და მოქმედება აღარ გააგრძელა.
ინციდენტები მაისში მოხდა. კომპანიებს, რომელთა სისტემებშიც Gemini-მ შეაღწია, მომხდარის შესახებ ინფორმაცია მიაწოდეს.
შემთხვევები კიბერუსაფრთხოების დამოუკიდებელი კომპანია Irregular-ის მიერ ჩატარებული ტესტის დროს დაფიქსირდა. კომპანია ხელოვნური ინტელექტის სისტემებისა და სხვა ტექნოლოგიების კიბერუსაფრთხოების შესაძლებლობებს აფასებს.
აღნიშნული შემთხვევების შესახებ პირველად The Wall Street Journal-მა დაწერა.
Irregular-მა BBC-ს განუცხადა, რომ Google-სა და ყველა დაზარალებულ ორგანიზაციას გამოძიების ფარგლებში ინფორმაცია ჯერ კიდევ ივლისში მიაწოდა.
„Irregular-მა დაუყოვნებლივ იმოქმედა და ჩვენი მხრიდან ყველა ცნობილი პრობლემა რამდენიმე კვირის წინ აღმოიფხვრა და მოგვარდა“, - განაცხადა კომპანიამ.
შემთხვევა ხელოვნური ინტელექტის განვითარების ტემპთან დაკავშირებით განახლებული დისკუსიის ფონზე გახდა ცნობილი. ტექნოლოგიური სექტორის ნაწილის წარმომადგენლები AI-ის სწრაფ განვითარებასთან დაკავშირებულ შესაძლო რისკებზე საუბრობენ და პროცესის შენელებისკენ მოუწოდებენ, თუმცა ამ მოსაზრებას ყველა კომპანია და ექსპერტი არ იზიარებს.
