20 სექტემბრის ღამეს მოსკოვსა და მოსკოვის ოლქზე დრონებით მასშტაბური შეტევა განხორციელდა. ერთ-ერთი სამიზნე რუსეთის დედაქალაქის სამხრეთ-აღმოსავლეთ ნაწილში, კაპოტნიაში მდებარე მოსკოვის ნავთობგადამამუშავებელი ქარხანა იყო.
ადგილობრივი ხელისუფლების ინფორმაციით, მოსკოვის ოლქში ორი ადამიანი დაიღუპა, ექვსი კი დაშავდა.
მოსკოვის მერმა სერგეი სობიანინმა მომხდარს ომის დაწყების შემდეგ რუსეთის დედაქალაქზე განხორციელებული ყველაზე მასშტაბური დრონებით თავდასხმა უწოდა. მისი განცხადებით, შაბათიდან რუსეთის საჰაერო თავდაცვამ 1600-ზე მეტი დრონი ჩამოაგდო, მათგან დაახლოებით 450 - „მოსკოვის მისადგომებთან“. რამდენიმე უპილოტო საფრენმა აპარატმა ნავთობგადამამუშავებელი ქარხნის ტერიტორიამდე მიაღწია.
ქარხნის ტერიტორიიდან გავრცელებულ კადრებში ძლიერი ხანძარი ჩანს. Reuters-ის კორესპონდენტებმა მოსკოვში აფეთქებების ხმა გაიგონეს და ნავთობგადამამუშავებელი ქარხნის ტერიტორიიდან ამომავალი კვამლიც დააფიქსირეს. ზარალის მასშტაბი ამ დროისთვის უცნობია.
დრონის ჩამოვარდნა და აფეთქება საცხოვრებელ რაიონშიც დაფიქსირდა. ASTRA-ს ცნობით, შემთხვევა ბორისოვსკიე-პრუდის ქუჩაზე, მრავალსართულიან სახლთან მოხდა. მოსკოვში დაღუპულთა შესახებ ინფორმაცია არ გავრცელებულა.
ASTRA-ს OSINT-ანალიზის თანახმად, მოსკოვის ოლქის სოფელ სოფინოში შეტევის შედეგად სასაწყობე კომპლექსიც დაზიანდა. რამენსკოეს რაიონში კი დრონის ჩამოვარდნის შემდეგ 21-სართულიანი საცხოვრებელი კორპუსის სახურავს ცეცხლი გაუჩნდა. შენობიდან 400 ადამიანის, მათ შორის 70 ბავშვის ევაკუაცია განხორციელდა.
შეტევა რუსეთში სახელმწიფო სათათბიროს არჩევნების ბოლო დღეს დაემთხვა. სობიანინის მტკიცებით, დრონებით თავდასხმის მიზანი არჩევნების ჩაშლა იყო, თუმცა, მისი თქმით, „მიზანს ვერ მიაღწია“.
უკრაინის პრეზიდენტ ვოლოდიმირ ზელენსკის განცხადებით, „შორ მანძილზე განხორციელებული საპასუხო დარტყმების“ შედეგად დაზიანდა „რუსეთის ნავთობის ინდუსტრიის ერთ-ერთი საკვანძო ობიექტი და აგრესორის ლოგისტიკური ინფრასტრუქტურა“.
„საუბარია მილიარდობით დოლარზე, რომელიც რუსეთის საომარ მანქანას ამუშავებს“, - დაწერა ზელენსკიმ სოციალურ ქსელში.
უკრაინის პრეზიდენტის თქმით, ოპერაციისას დრონებთან ერთად სხვადასხვა ტიპის რაკეტაც გამოიყენეს, მათ შორის „ფლამინგო“ და „პელიკანი“.
ზელენსკიმ მოსკოვის გარდა ვორონეჟის ოლქში მდებარე ობიექტზე განხორციელებული შეტევაც დაადასტურა.
„მოსკოვმა უნდა შეწყვიტოს თავისი სასტიკი ომი და მშვიდობა აირჩიოს, ნაცვლად იმისა, რომ სხვა რეგიონების ხარჯზე საჰაერო თავდაცვის მრავალშრიან რგოლებს ქმნიდეს“, - განაცხადა უკრაინის პრეზიდენტმა.
მისივე თქმით, „დეესკალაციისკენ გადადგმული ნაბიჯები უკვე მაგიდაზეა, მათ შორის ენერგეტიკისა და სურსათის უსაფრთხოების მიმართულებით. საჭიროა პოლიტიკური ნება“.
ზელენსკიმ უკრაინელ მებრძოლებს დარტყმების სიზუსტისთვის მადლობა გადაუხადა.
