საქართველოსა და ნაურუს რესპუბლიკას შორის დიპლომატიური ურთიერთობები ოფიციალურად დამყარდა. შესაბამის დოკუმენტს ნიუ-იორკში გამართულ შეხვედრაზე ხელი მოაწერეს ირაკლი კობახიძემ და ნაურუს პრეზიდენტმა დევიდ ადეანგმა.
საქართველოს მთავრობის ცნობით, კობახიძემ ნაურუს პრეზიდენტს კიდევ ერთხელ გადაუხადა მადლობა აფხაზეთისა და ცხინვალის რეგიონის ე.წ. დამოუკიდებლობის აღიარების გაუქმებისა და მათთან დიპლომატიური ურთიერთობების შეწყვეტისთვის.
საქართველოს მთავრობამ ნაურუსთან დიპლომატიური ურთიერთობების დამყარების შესახებ ოქმის ხელმოწერის თაობაზე განკარგულება 16 სექტემბერს გამოსცა.
ნაურუმ რუსეთის მიერ ოკუპირებულ აფხაზეთსა და ე.წ. სამხრეთ ოსეთთან დიპლომატიური ურთიერთობების გაუქმების გადაწყვეტილება 2026 წლის 21 ივლისს მიიღო. საქართველოს საგარეო საქმეთა სამინისტრომ მაშინ განაცხადა, რომ მიესალმებოდა ამ გადაწყვეტილებას და ნაურუსთან დიპლომატიური ურთიერთობების დასამყარებლად მზად იყო.
სოხუმსა და ცხინვალში ნაურუს გადაწყვეტილება დასავლეთის ზეწოლას დაუკავშირეს.
ნაურუ წყნარ ოკეანეში მდებარე ერთ-ერთი ყველაზე პატარა სახელმწიფოა. მისი ფართობი დაახლოებით 21 კვადრატული კილომეტრია, მოსახლეობა კი დაახლოებით 12 ათას ადამიანს შეადგენს.
ნაურუს გადაწყვეტილებიდან დაახლოებით ერთი თვის შემდეგ, 27 აგვისტოს, კობახიძესა და ადეანგს შორის სატელეფონო საუბარიც შედგა. საუბრისას მხარეებმა დიპლომატიური ურთიერთობების დამყარებისა და სხვადასხვა სფეროში თანამშრომლობის განვითარების შესაძლებლობები განიხილეს.
