CNN-მა, MS NOW-მ და Politico-მ აშშ-ის პრეზიდენტ დონალდ ტრამპსა და მისი ადმინისტრაციის წარმომადგენლებს სასამართლოში უჩივლეს მას შემდეგ, რაც მათ ჟურნალისტებს თეთრი სახლის ტერიტორიაზე შესვლა აუკრძალეს.
მედიასაშუალებები აცხადებენ, რომ გადაწყვეტილება არღვევს აშშ-ის კონსტიტუციის პირველი შესწორებით დაცულ სიტყვისა და პრესის თავისუფლებას. ისინი ვაშინგტონის ფედერალურ სასამართლოს სთხოვენ, დროებით შეაჩეროს აკრძალვის მოქმედება. საქმის მოსმენა ოთხშაბათს არის დაგეგმილი.
ერთობლივ განცხადებაში CNN, MS NOW და Politico აღნიშნავენ, რომ თუ გადაწყვეტილება გასაჩივრების გარეშე დარჩება, საფრთხე შეექმნება როგორც პრესის თავისუფლებას, ისე საზოგადოების უფლებას, მიიღოს ხელისუფლების ჩარევისგან დამოუკიდებელი ჟურნალისტური ინფორმაცია. მათი თქმით, ხელისუფლება არ უნდა წყვეტდეს, რას გააშუქებს ან გამოაქვეყნებს პრესა.
ტრამპმა სამი მედიასაშუალების აკრძალვის შესახებ პარასკევს სოციალურ ქსელში განაცხადა. მისი თქმით, მედიას არ უნდა შეეძლოს აშშ-ის პრეზიდენტის შესახებ „გამოგონილი ამბებისა და ტყუილების“ მუდმივად გავრცელება.
ორშაბათს ტრამპმა გადაწყვეტილება კიდევ ერთხელ დაიცვა და განაცხადა, რომ თეთრი სახლი თავისუფალ პრესას კი არა, მის მიერ „ყალბ ახალ ამბებად“ შეფასებულ გაშუქებას ებრძვის. მან ეს ეროვნული უსაფრთხოებისთვის საფრთხედაც შეაფასა, თუმცა ამ მტკიცების დამადასტურებელი მტკიცებულებები არ წარმოუდგენია.
აშშ-ის პრეზიდენტებს მედიასთან დაპირისპირება წარსულშიც ჰქონიათ, თუმცა Reuters-ის შეფასებით, ტრამპის მედიის წინააღმდეგ მიმართული კამპანია მასშტაბით გამორჩეულია. მისი ადმინისტრაცია არაერთ მსხვილ მედიასაშუალებას უზღუდავს წვდომას, თავად ტრამპი ხშირად ესხმის თავს ჟურნალისტებს მათი მასალების გამო და უფრო ხელსაყრელ პირობებს უქმნის იმ მედიას, რომელსაც ადმინისტრაციის მიმართ კეთილგანწყობილად მიიჩნევს. პრეზიდენტმა რამდენიმე მედიასაშუალების წინააღმდეგ სარჩელებიც შეიტანა.
CNN იმ ხუთ მსხვილ ტელეკომპანიას შორისაა, რომლებიც თეთრი სახლის ძირითად სატელევიზიო „პულს“ ქმნიან. ჯგუფში ასევე შედიან ABC, CBS, Fox News და NBC. ტელეკომპანიები პრეზიდენტის გაშუქების ხარჯებს ინაწილებენ, მორიგეობით უზრუნველყოფენ ვიდეოგადაღებას და მასალას სხვა მედიასაშუალებებსაც აწვდიან.
ორშაბათს CNN-ს დონალდ ტრამპის ნიუ-იორკში, გაეროს გენერალურ ასამბლეაზე ვიზიტის გაშუქება ევალებოდა, თუმცა აკრძალვის გამო სხვა მედიებისთვის საერთო ვიდეოსიგნალის მიწოდება ვერ შეძლო.
ამის საპასუხოდ, დანარჩენმა მსხვილმა ტელეკომპანიებმა პრეზიდენტის ღონისძიებების „პულის“ ფორმატით გაშუქება შეაჩერეს. შედეგად, თეთრი სახლის ღონისძიებებიდან ყველაზე ფართოდ გამოყენებული დამოუკიდებელი ვიდეოსიგნალი დროებით აღარ გადაიცემა.
ეს ხდება იმ პერიოდში, როდესაც ტრამპი გაეროს გენერალური ასამბლეის ფარგლებში მსოფლიო ლიდერებთან შეხვედრებს მართავს და მოგვიანებით ვაშინგტონში ჩინეთის პრეზიდენტ სი ძინპინს უნდა უმასპინძლოს.
Fox News-ის ვაშინგტონის ბიუროს ხელმძღვანელმა და სატელევიზიო „პულის“ მოქმედმა თავმჯდომარემ ბრაიან ბოტონმა მედიასაშუალებებს აცნობა, რომ ორშაბათიდან პრეზიდენტის „პულისთვის“ განკუთვნილი ღონისძიებები აღარ გაშუქდებოდა და CNN-ის ნაცვლად სხვა ტელეკომპანია არ დაინიშნებოდა.
ამ ფონზე თეთრი სახლის პრესის ოთახში ჟურნალისტები მუშაობას ჩვეულ რეჟიმში აგრძელებდნენ და დღის ღონისძიებებს გეგმავდნენ, მათ შორის სამხრეთ მინდორზე Marine One-ის ახალი ვერტმფრენის მოედნის გახსნის ცერემონიის გაშუქებას.
თეთრი სახლი საკუთარი პირდაპირი ტრანსლაციის გამოყენებას „პულის“ სიგნალის ალტერნატივად სთავაზობდა მედიას, თუმცა ცერემონიის დროს მის პირდაპირ ეთერში აუდიო პრაქტიკულად არ ისმოდა.
Reuters-ის შეკითხვებზე პასუხად თეთრმა სახლმა განაცხადა, რომ მედიასაშუალებებს ოვალურ კაბინეტში ადგილის მოთხოვნის უფლება არ აქვთ და მათ თეთრი სახლის ტერიტორიის გარედანაც შეუძლიათ მუშაობა.
ტრამპის პირველი საპრეზიდენტო ვადის დროს მისმა ადმინისტრაციამ CNN-ის მაშინდელი კორესპონდენტის, ჯიმ აკოსტასა და Playboy-ის ჟურნალისტის, ბრაიან კარემის აკრედიტაციების გაუქმებაც სცადა. ორივე შემთხვევაში ფედერალურმა მოსამართლეებმა ჟურნალისტებისთვის თეთრი სახლის პრესის საშვების აღდგენა მოითხოვეს.
CNN-ის, MS NOW-ისა და Politico-ს ახალი სარჩელი აშშ-ის საოლქო მოსამართლე ტიმოთი კელის გადაეცა. კელი ტრამპმა ფედერალურ მოსამართლედ 2017 წელს დანიშნა. სწორედ მან მიიღო 2018 წელს ადმინისტრაციის წინააღმდეგ გადაწყვეტილება ჯიმ აკოსტას საქმეში.
მეორე საპრეზიდენტო ვადის დაწყების შემდეგ ტრამპმა კიდევ უფრო გააძლიერა მედიასთან დაპირისპირება. მან რამდენიმე მედიასაშუალებას უჩივლა და არაერთხელ მოუწოდა მაუწყებლებს, ეთერიდან მოეხსნათ პროგრამები, რომელთა გაშუქებასაც უსამართლოდ მიიჩნევს.
ტრამპმა ასევე მოუწოდა კომუნიკაციების ფედერალურ კომისიას, მისთვის მიუღებელ ტელე და რადიოსადგურებს სამაუწყებლო ლიცენზიები ჩამოართვას.
გასულ წელს ტრამპის ადმინისტრაციამ Associated Press-ის ჟურნალისტებს პრეზიდენტის გადაადგილების გამშუქებელი „პულის“ წევრობა შეუზღუდა მას შემდეგ, რაც სააგენტომ უარი თქვა მექსიკის ყურისთვის ტრამპის მიერ სასურველი სახელწოდების გამოყენებაზე. AP-მ გადაწყვეტილება სასამართლოში გაასაჩივრა.
ტრამპის ადმინისტრაციამ ასევე შეზღუდა არაერთი ჟურნალისტის წვდომა პენტაგონზე.
