ოფიციალური ინფორმაციით, პილოტმა კატაპულტირება უსაფრთხოდ მოახერხა. სავარაუდოდ, თვითმფრინავი სასწავლო ფრენის შემდეგ შპანგდალემის ავიაბაზაზე დაშვებისას ჩამოვარდა.

აშშ-ის სამხედრო ძალების განცხადებით, სამშაბათს დასავლეთ გერმანიაში, შპანგდალემის ამერიკულ ავიაბაზაზე განთავსებული F-16 ტიპის გამანადგურებელი ჩამოვარდა.

სამხედროების ინფორმაციით, თვითმფრინავში ერთი პილოტი იმყოფებოდა. მან კატაპულტირება უსაფრთხოდ მოახერხა და ამჟამად სამედიცინო დახმარებას იღებს.

ინციდენტის გამომწვევი მიზეზი ჯერჯერობით უცნობია და გამოძიება მიმდინარეობს. შემთხვევის ადგილზე საგანგებო სამსახურები მუშაობენ.

გერმანიის საჰაერო მოძრაობის კონტროლის სამსახურის ინფორმაციით, სასწავლო წვრთნაში სულ ოთხი F-16 მონაწილეობდა.

უწყების განცხადებით, ორი თვითმფრინავი ჯერ კიდევ საწვრთნელ ზონაში იმყოფებოდა, ხოლო ორი შპანგდალემის ავიაბაზაზე ბრუნდებოდა.

„სავარაუდოდ, ამ ორი თვითმფრინავიდან ერთ-ერთი ბაზასთან მიახლოებისა და დაშვების პროცესში ჩამოვარდა“, - ნათქვამია განცხადებაში.

დანარჩენი F-16-ები უსაფრთხოდ დაეშვნენ აშშ-ის საჰაერო ძალების რამშტაინის ავიაბაზაზე.