რედაქტორის შენიშვნა: ეს სტატია თარგმნილია VOA-ს რუსულენოვანი ორიგინალიდან.
რუსული უფლებადამცველი ორგანიზაციის ინფორმაციით, უკრაინაში ომის დაწყებიდან 2022 წელს, რუსეთში ან რუსეთის მიერ ოკუპირებულ ტერიტორიებზე, პოლიტიკური დევნის მსხვერპლთა შორის სულ მცირე 69 ადამიანი გარდაიცვალა.
რუსეთში პოლიტიკური რეპრესიების მსხვერპლთა ხსოვნის დღის წინა საღამოს, ადამიანის უფლებათა პროექტის „პოლიტპატიმრები. მემორიალი“ ხელმძღვანელმა სერგეი დავიდისმა განაცხადა, რომ სიკვდილის ყველაზე გავრცელებული მიზეზი ავადმყოფობა და სამედიცინო დახმარების ნაკლებობაა.
დავიდისის თქმით, მისი გუნდი 2008 წლიდან ადგენს პოლიტპატიმართა სიებს და აკვირდება პოლიტიკურ რეპრესიებს: ამ პერიოდში, პოლიტიკურად მოტივირებული პატიმრობის შედეგად, 81 ადამიანი დაიღუპა. „ამათგან, — ამბობს დავიდისი, — 69 ომის დაწყების შემდეგ გარდაიცვალა. ზრდა უზარმაზარია.“
რუსეთის ოფიციალურ პირებს ამ კონკრეტულ ანგარიშზე კომენტარი არ გაუკეთებიათ, თუმცა კრემლის პრესსპიკერმა დმიტრი პესკოვმა, სულ ცოტა, სექტემბერში უარყო ცნობები იმის შესახებ, რომ რუსეთში პოლიტპატიმრები არსებობენ.
დავიდისის თქმით, ომის დაწყების შემდეგ, რეპრესიების მასშტაბი მნიშვნელოვნად გაიზარდა.
„როდესაც სიტუაციის მონიტორინგი დავიწყეთ, ჩვენს სიაში დაახლოებით 30 ადამიანი იყო. დღეს პოლიტპატიმართა რაოდენობამ 1 800-ს გადააჭარბა,“ — აღნიშნა მან.
მან ასევე განაცხადა, რომ რეპრესიები უფრო მკაცრი გახდა.
„როდესაც მონიტორინგი დავიწყეთ, წამება ისეთი გავრცელებული არ იყო, როგორც ახლა, მაგალითად, უკრაინის მოქალაქეების საქმეებში,“ — ამბობს დავიდისი.
უფლებადამცველის თქმით, ავადმყოფობით გამოწვეული სიკვდილიანობა და სამედიცინო დახმარების უარყოფა ან დაგვიანებული მიწოდება სისტემურ პრობლემად იქცა. ანგარიშში ასევე აღნიშნულია, რომ „პოლიტიკურად მოტივირებული პატიმრობის მსხვერპლთა შორის სულ უფრო მეტი ახალგაზრდა, მათ შორის არასრულწლოვანი, ფიქსირდება.“
დავიდისის თქმით, რუსეთში პოლიტიკური რეპრესიები არ არის ცალკეული მოსამართლეების ან უსაფრთხოების სამსახურის თანამშრომლების მიერ განხორციელებული შემთხვევითი მოვლენა.
„ამ რეპრესიების სისასტიკე და პატიმრების მიმართ ყოველგვარი შემწყნარებლობის არარსებობა არის სახელმწიფო პოლიტიკის განზრახ შედეგი და არა მხოლოდ ცალკეული ჩინოვნიკების გადაცდომა,“ — განაცხადა მან. „პირდაპირ პასუხისმგებლობა ეკისრებათ მათ, ვინც კონკრეტული პოლიტპატიმრების სიკვდილში მონაწილეობდა და ისინი პასუხისგებაში უნდა მიეცნენ.“
