საქართველოში სამედიცინო მომსახურება და მედიკამენტები კვლავ ძვირდება. განსაკუთრებით გაზრდილია სტომატოლოგიური მომსახურების, ანტიბიოტიკებისა და ექიმის კონსულტაციის ღირებულება. 2026 წლის ოქტომბერში ჯანდაცვის სექტორში ფასების წლიურმა ზრდამ 8.4% შეადგინა, რაც ქვეყანაში დაფიქსირებულ საერთო ინფლაციაზე მაღალია.
სტატისტიკის ეროვნული სამსახურის მონაცემებით, ოქტომბერში წლიური ინფლაცია 5.9% იყო, თუმცა ჯანმრთელობის დაცვის მიმართულებით ფასები უფრო სწრაფად გაიზარდა. ჯანდაცვის სექტორის გაძვირებამ მთლიან წლიურ ინფლაციაში 0.69 პროცენტული პუნქტი შეიტანა.
ყველაზე მკვეთრად სტომატოლოგიური მომსახურება გაძვირდა. კერძოდ, კბილის ამოღების ღირებულება ერთ წელიწადში 16.27%-ით გაიზარდა, დაბჟენის ფასი კი 13.81%-ით. მნიშვნელოვნად მოიმატა თერაპევტის კონსულტაციის საფასურმაც - 11.76%-ით.
გაძვირება შეეხო მედიკამენტებსაც. ანტიბიოტიკების ფასი წლიურად 13.88%-ით გაიზარდა, ანთების საწინააღმდეგო პრეპარატების - 9.01%-ით, ხოლო საჭმლის მომნელებელი სისტემის სამკურნალო მედიკამენტების - 5.68%-ით.
მომატებულია დიაგნოსტიკური მომსახურების ღირებულებაც. ექოსკანირება 8.65%-ით, სისხლის ანალიზი კი 6.57%-ით გაძვირდა.
საქსტატის მონაცემებით, მთლიანობაში ამბულატორიული სამედიცინო მომსახურების ფასები 11.7%-ით გაიზარდა, სამედიცინო პროდუქციის, აპარატურისა და მოწყობილობების ჯგუფში კი ზრდამ 9.4% შეადგინა.რა გაძვირდა ყველაზე მეტად?
2026 წლის ოქტომბრის მონაცემებით, გასული წლის ანალოგიურ პერიოდთან შედარებით, ყველაზე მეტად - 16.27%-ით - კბილის ამოღების მომსახურება გაძვირდა. ანტიბიოტიკების ფასი 13.88%-ით გაიზარდა, კბილის დაბჟენის - 13.81%-ით, ხოლო თერაპევტის კონსულტაციის - 11.76%-ით.
ასევე გაძვირდა ანთების საწინააღმდეგო პრეპარატები - 9.01%-ით, ექოსკანირება - 8.65%-ით, სისხლის ანალიზი - 6.57%-ით და საჭმლის მომნელებელი სისტემის სამკურნალო პრეპარატები - 5.68%-ით.
შედარებით ნაკლები ზრდა დაფიქსირდა სამედიცინო პროდუქტებისა და მოწყობილობების მიმართულებით. კერძოდ, შპრიცის ფასი 4.52%-ით გაიზარდა, წნევის საზომი აპარატის - 3.77%-ით, ვიტამინების - 2.02%-ით, სათვალის ლინზების - 1.71%-ით, საავადმყოფოს მომსახურების - 0.97%-ით, ხოლო ბამბის - 0.68%-ით.
ამასთან, სამშობიარო მომსახურების ღირებულება უცვლელი დარჩა. ფასების კლება მხოლოდ ცალკეულ მიმართულებებში დაფიქსირდა: ქირურგიული მომსახურება 0.9%-ით გაიაფდა, ხოლო თერმომეტრის ფასი 3.17%-ით შემცირდა.
მიუხედავად ცალკეულ მომსახურებებსა და პროდუქტებზე ფასების კლებისა, საერთო სურათი აჩვენებს, რომ ჯანდაცვა მოსახლეობისთვის უფრო ძვირი ხდება. განსაკუთრებით შესამჩნევია ფასების ზრდა ყოველდღიურად საჭირო მედიკამენტებზე, ექიმის კონსულტაციებსა და სტომატოლოგიურ მომსახურებაზე.
ჯანდაცვის ფასების 8.4%-იანი ზრდა, საერთო 5.9%-იანი ინფლაციის ფონზე, ნიშნავს, რომ სამედიცინო საჭიროებების დაკმაყოფილების ღირებულება საშუალო სამომხმარებლო კალათაზე სწრაფად იზრდება.
