ნიუ-იორკის ქალაქ ბრუკლინში საცხოვრებელ კორპუსში გაჩენილი ხანძრის შედეგად ექვსი ადამიანი დაიღუპა, აცხადებენ ოფიციალური პირები.
ნიუ-იორკის სახანძრო დეპარტამენტის (FDNY) განცხადებით, ხანძრის შედეგად რამდენიმე ადამიანი დაშავდა. შემთხვევა ხუთშაბათს დილით, ადრე მოხდა.
ხანძრის შესახებ შეტყობინების მიღებისთანავე, დაახლოებით 01:40 საათზე (ადგილობრივი დროით; 06:40 GMT), შემთხვევის ადგილზე, სანსეტ პარკის მახლობლად, 230-ზე მეტი მეხანძრე და სასწრაფო სამედიცინო დახმარების თანამშრომელი გაიგზავნა.
ხანძრის გამომწვევი მიზეზი ამ ეტაპზე იძიება.
ადგილზე ასევე მივიდა საშიში მასალების სპეციალიზებული ჯგუფი, რადგან შენობაში ლითიუმ-იონური ბატარეა იყო აღმოჩენილი, თუმცა უცნობია, უკავშირდება თუ არა ეს ბატარეა ხანძრის გაჩენას.
მედიის ცნობით, მაშველებმა ადგილზე მისვლისას შენობის პირველი და მეორე სართული მთლიანად ცეცხლში გახვეული დახვდათ.
დაღუპულთაგან ოთხის ცხედარი შემთხვევის ადგილზე იპოვეს. ორი ადამიანი კრიტიკულ მდგომარეობაში იყო და მოგვიანებით გარდაიცვალა. ამერიკული მედიის ცნობით, განსხვავებული ინფორმაცია ვრცელდება იმის შესახებ, საავადმყოფოში გარდაიცვალნენ ისინი თუ გზაში.
FDNY-ს ინფორმაციით, დაშავდა კიდევ ექვსი მშვიდობიანი მოქალაქე, მათგან ორი კრიტიკულად, ასევე სამი მეხანძრე.
