ფინეთის სასამართლომ ხუთშაბათს დამნაშავედ ცნო რუსული სატვირთო გემის „ფიტბურგის“ კაპიტანი და ეკიპაჟის უფროსი წევრი, რომლებმაც გასულ წელს ფინეთის ყურეში ორი წყალქვეშა სატელეკომუნიკაციო კაბელი დააზიანეს.

ჰელსინკის რაიონულმა სასამართლომ ორივე ბრალდებული „განსაკუთრებით მძიმე დანაშაულებრივი ზიანის მიყენებაში“ ცნო დამნაშავედ.

სასამართლოს განცხადებაში ნათქვამია, რომ მათ განზრახ გაათრიეს გემის ღუზა ზღვის ფსკერზე დაახლოებით 130 კილომეტრის (81 მილის) მანძილზე.

კაპიტანს სამ წლამდე და ექვს თვემდე თავისუფლების აღკვეთა მიესაჯა, ხოლო ეკიპაჟის წევრს, რომელიც აზერბაიჯანის მოქალაქეა, ორი წელი და ათი თვე.

Reuters-ის ინფორმაციით, ორივეს დაეკისრა ერთობლივად დაახლოებით 1.9 მილიონი ევროს (2.1 მილიონი დოლარი) ზიანის ანაზღაურება, ხოლო კაპიტანს დამატებით დაახლოებით 85,000 ევროს გადახდა მოუწევს.

ბრალდებულებმა უარყვეს დანაშაულის ჩადენა და ეჭვქვეშ დააყენეს ფინეთის იურისდიქცია საქმეზე.

რა ვიცით კიდევ „ფიტბურგის“ სატვირთო გემზე?

ფინეთის ხელისუფლებამ გემი 31 დეკემბერს დააკავა ეჭვის საფუძველზე, რომ მან დააზიანა კაბელები, რომლებიც ფინეთის დედაქალაქ ჰელსინკისა და ესტონეთის დედაქალაქ ტალინს აკავშირებს.

ფინეთის პოლიციის განცხადებით, გემი რამდენიმე საათის განმავლობაში ათრევდა ღუზას, როდესაც ის აღმოაჩინეს.

„ფიტბურგი“ და მისი 14-კაციანი ეკიპაჟი ინციდენტის დროს რუსეთის ქალაქ სანქტ-პეტერბურგიდან ისრაელის ქალაქ ჰაიფას პორტისკენ მიემგზავრებოდა.

ფინეთმა გააძლიერა წყალქვეშა ინფრასტრუქტურის დაცვა მას შემდეგ, რაც ბალტიის ზღვაში კაბელებისა და მილსადენების დაზიანების რამდენიმე შემთხვევა დაფიქსირდა რუსეთის მიერ უკრაინაში სრულმასშტაბიანი შეჭრის შემდეგ, 2022 წლიდან.