GWP რუსთაველის გამზირზე წყალმომარაგებისა და წყალარინების სისტემის განახლებაში 12.5 მილიონი ლარის ინვესტიციას დებს.
კომპანიის ინფორმაციით, პროექტი 5 კილომეტრზე მეტი სიგრძის ქსელის სრულ გამოცვლას, 87 საკვანძო ჭისა და 15 თანამედროვე სახანძრო ჰიდრანტის მოწყობას მოიცავს. სამუშაოების პერიოდში არსებული ქსელი ექსპლუატაციაში რჩება, რათა წყალმომარაგება არ შეწყდეს.
უშუალოდ რუსთაველის გამზირის რეაბილიტაცია თბილისის ბიუჯეტს 19.8 მილიონი ლარი უჯდება. სამუშაოების შემსრულებელი კომპანიის განცხადებით, პროექტის დასასრულებლად განსაზღვრული 100-დღიანი ვადა შესაძლოა საკმარისი არ აღმოჩნდეს, რადგან სამუშაო არეალი შეზღუდულია, ადგილზე რამდენიმე კონტრაქტორი მუშაობს და პროექტში ცვლილებების შეტანაც გახდა საჭირო.
რუსთაველის გამზირის რეაბილიტაცია 23 ივლისს დაიწყო. ამ დროისთვის გამზირსა და მერაბ კოსტავას ქუჩის ნაწილზე ავტოტრანსპორტის მოძრაობა სრულად შეზღუდულია.
