უკრაინის პრეზიდენტის, ვოლოდიმირ ზელენსკის განცხადებით, რუსეთმა მხოლოდ ამ კვირაში უკრაინის 13 რეგიონს შეუტია და ქალაქებისა და დასახლებების მიმართულებით 1 550-ზე მეტი დრონი, დაახლოებით 1 560 მართვადი საავიაციო ბომბი და 62 რაკეტა გაუშვა. მისი თქმით, რაკეტების უმეტესობა სხვადასხვა ტიპის ბალისტიკური რაკეტა იყო.

ზელენსკის ინფორმაციით, რუსეთის მიერ კიევზე განხორციელებული ბოლო თავდასხმის შედეგად ექვსი ადამიანი დაშავდა. ბალისტიკური რაკეტებით დაიბომბა კრემენჩუკი და კრივოი როგიც. კრივოი როგში ორი ადამიანი დაიღუპა და 14 დაშავდა, სუმიში კი ერთი ადამიანი დაიღუპა.

უკრაინის პრეზიდენტმა მადლობა გადაუხადა საგანგებო სიტუაციების სამსახურის თანამშრომლებს, პოლიციასა და მედიკოსებს და პარტნიორებს უკრაინის საჰაერო თავდაცვის გაძლიერებისკენ მოუწოდა.

„როდესაც აქ, ევროპაში, ჩრდილოეთ კორეული ბალისტიკური რაკეტები ინფრასტრუქტურას ანადგურებენ და ადამიანებს სიცოცხლეს ართმევენ, ევროპული რაკეტსაწინააღმდეგო სისტემები უბრალოდ საწყობებში არ უნდა ინახებოდეს. ადამიანების სიცოცხლე უნდა დავიცვათ. რუსეთი უნდა შეჩერდეს“, - განაცხადა ზელენსკიმ.

მისი თქმით, უკრაინისთვის დახმარების ახალი პაკეტები ყოველდღიურად გადარჩენილ სიცოცხლესა და დაცულ ინფრასტრუქტურას ნიშნავს.