ოკუპირებული დონეცკის ე.წ. უზენაესმა სასამართლომ საქართველოს მოქალაქე კახაბერ ამირანაშვილს, უკრაინის მხარეს ბრძოლისთვის, დაუსწრებლად 13 წლითა და 6 თვით თავისუფლების აღკვეთა მიუსაჯა. ინფორმაციას რუსული მედია ავრცელებს.

გავრცელებული ცნობით, ამირანაშვილმა სასჯელი მკაცრი რეჟიმის კოლონიაში უნდა მოიხადოს. მასზე საერთაშორისო ძებნაც გამოცხადდა.

რუსული მხარის მტკიცებით, საქართველოს მოქალაქე უკრაინაში 2022 წლის გაზაფხულზე ჩავიდა, „ქართული ეროვნული ლეგიონის“ შემადგენლობაში გაწევრიანდა და სამხედრო მომზადება გაიარა. ბრალდების თანახმად, ის 2022 წლის ივლისამდე რუსეთის შეიარაღებული ძალების წინააღმდეგ მიმდინარე საბრძოლო მოქმედებებში მონაწილეობდა.

რუსული მედია ამირანაშვილს „დაქირავებულ მებრძოლად“ მოიხსენიებს. უკრაინისა და საქართველოს მხარეებს გავრცელებულ ინფორმაციასთან დაკავშირებით კომენტარი ჯერჯერობით არ გაუკეთებიათ. სასამართლოს გადაწყვეტილების დამოუკიდებლად გადამოწმება შეუძლებელია, რადგან ის რუსეთის მიერ ოკუპირებულ ტერიტორიაზე მოქმედმა ე.წ. სასამართლომ მიიღო.