16 აგვისტოს ღამით მოსკოვისა და როსტოვის ოლქებზე დრონების მასშტაბური თავდასხმების შედეგად რამდენიმე საწყობში ხანძარი გაჩნდა. არის მსხვერპლიც.

მოსკოვის ოლქის გუბერნატორის, ანდრეი ვორობიოვის განცხადებით, პოდოლსკში, „კოლედინოს“ ინდუსტრიულ პარკში, დრონის დარტყმის შედეგად კომპანია Wildberries-ის საწყობში ხანძარი გაჩნდა. თანამშრომლების ევაკუაცია დროულად მოხდა და არავინ დაშავებულა.

გავრცელებულ ვიდეოებში ჩანს მასშტაბური ხანძარი, რომლის ჩაქრობასაც ვერტმფრენებით ცდილობდნენ. „კოლედინო“ Wildberries-ის ერთ-ერთი უდიდესი საწყობია.

ობიექტი ივლისის შუა რიცხვებიდან არაერთხელ გახდა თავდასხმის სამიზნე. Reuters-ის ცნობით, ივლისის ბოლოს რამდენიმე დღეში Wildberries-ის მინიმუმ შვიდი საწყობი დაზიანდა, ხოლო AP-ის ინფორმაციით, აგვისტოს დასაწყისისთვის იერიში თორმეტზე მეტ ობიექტზე იყო მიტანილი.

უკრაინის ხელისუფლება აცხადებს, რომ კომპანიის საწყობები რუსეთის სამხედრო საჭიროებების მომარაგებაშია ჩართული. Wildberries და კრემლი ბრალდებას უარყოფენ.

16 აგვისტოს ხანძარი გაჩნდა მედიკამენტების საწყობშიც, დომოდედოვოში, მოსკოვის სამხრეთით. ექსპერტების ინფორმაციით, ცეცხლი „ჩრდილოეთ დომოდედოვოს“ ლოგისტიკური ცენტრის საცავს გაუჩნდა.

ვორობიოვის განცხადებით, მოსკოვის ოლქის რამენსკის რაიონში კერძო სახლზე დრონის დარტყმის შედეგად ხანდაზმული მამაკაცი დაიღუპა და ექვსი ადამიანი დაშავდა. მოსკოვის მერის, სერგეი სობიანინის თქმით, MKAD-თან კიდევ სამი ადამიანი დაშავდა.

როსტოვის ოლქის გუბერნატორმა, იური სლიუსარმა განაცხადა, რომ თავდასხმის შედეგად სამი ადამიანი დაიღუპა და ერთი დაშავდა, თუმცა დარტყმის ადგილი არ დაუკონკრეტებია.

ვორობიოვმა მოსკოვის ოლქზე თავდასხმას ბოლო დროის ერთ-ერთი ყველაზე მასშტაბური უწოდა. სობიანინის თქმით, 15 აგვისტოს საღამოდან მოსკოვის მიმართულებით დაახლოებით 600 დრონი გაფრინდა, რომელთაგან 201 მოსკოვის ოლქის თავზე გაანადგურეს.

რუსეთის სამხედრო უწყების განცხადებით, ღამის განმავლობაში სულ 822 დრონი ჩამოაგდეს. უწყებას არ დაუკონკრეტებია, რამდენმა მათგანმა მიაღწია მიზნამდე. უკრაინულ მხარეს ამ დარტყმებზე კომენტარი ჯერ არ გაუკეთებია.

პარალელურად, უკრაინის ოფიციალური პირების ინფორმაციით, რუსეთის სარაკეტო და დრონებით თავდასხმების შედეგად უკრაინაში სულ მცირე ერთი ადამიანი დაიღუპა და დაახლოებით 20 დაშავდა.

კრივოი როგში ინდუსტრიული ობიექტის დაზიანების შედეგად ერთი ადამიანი დაიღუპა და 13 დაშავდა. კიევში რამდენიმე ხანძარი გაჩნდა, მათ შორის „პეტროვკის“ წიგნების ბაზრობაზე, რომელიც განმეორებითი ხანძრის შედეგად მთლიანად განადგურდა.

კიევში სამი ადამიანი დაშავდა, კიდევ სამი კი კიევის მიმდებარე ოლქში. უკრაინის სამხედრო-საჰაერო ძალების განცხადებით, რუსეთმა კიევზე, კრემენჩუგსა და კრივოი როგზე იერიში რაკეტებითა და 106 დრონით მიიტანა.