რუსეთის მიერ უკრაინაზე განხორციელებულ მასირებულ სარაკეტო და დრონებით შეტევას მსხვერპლი, ათობით დაშავებული, ნგრევა და ხანძრები მოჰყვა. დაღუპულთა შორის ბავშვებიც არიან.

უკრაინული მხარის დილის მონაცემებით, თავდასხმების შედეგად სულ მცირე რვა ადამიანი დაიღუპა. ყველაზე მეტი მსხვერპლი დნეპროპეტროვსკის ოლქის კრივოი-როგის რაიონშია, სადაც სარაკეტო დარტყმას ექვსი ადამიანი ემსხვერპლა, მათ შორის 6 წლის გოგო და 11 და 17 წლის ბიჭები. კიდევ რვა ადამიანი დაშავდა, მათგან 84 წლის ქალის მდგომარეობა მძიმეა.

დაბა რადუშნეში დარტყმამ ორი კერძო სახლი მთლიანად გაანადგურა, ხუთი კი დააზიანა. მაშველები ნანგრევებში მოყოლილი ადამიანების ძებნას აგრძელებდნენ. ნიკოპოლის რაიონში რუსული დრონებით შეტევის შედეგად კიდევ ორი ადამიანი დაშავდა.

შეტევის ერთ-ერთი მთავარი სამიზნე უკრაინის დედაქალაქი იყო. კიევში ერთი ადამიანი დაიღუპა და ორი დაშავდა. ქალაქის ორ რაიონში ხანძარი სავაჭრო პავილიონებსა და ხუთსართულიან არასაცხოვრებელ შენობაში გაჩნდა.

კიევის ოლქის ბროვარის რაიონში დაშავდა ხუთი ადამიანი, მათ შორის ბავშვი. ნაწილობრივ დაინგრა ორსართულიანი სახლი და დაზიანდა კიდევ ორი შენობა.

ერთი ადამიანი დაიღუპა პოლტავის რაიონშიც, სადაც თავდასხმის შემდეგ საწყობებში ხანძარი გაჩნდა.

მასირებული სარაკეტო შეტევა განხორციელდა ლვოვზეც. ადგილობრივი ხელისუფლების ინფორმაციით, დაშავდა ათობით ადამიანი, ნაწილობრივ დაინგრა ორი საცხოვრებელი კორპუსი, ხოლო დაზიანდა 20-ზე მეტი სახლი, სკოლა და ორი საბავშვო ბაღი.

უკრაინის საჰაერო ძალების ცნობით, ღამის განმავლობაში რუსეთმა უკრაინის წინააღმდეგ სულ 358 საჰაერო თავდასხმის საშუალება გამოიყენა — 284 უპილოტო საფრენი აპარატი და სხვადასხვა ტიპის 74 რაკეტა. მათ შორის იყო ოთხი „ცირკონის“ ტიპის გემსაწინააღმდეგო, ცხრა ბალისტიკური და 61 ფრთოსანი რაკეტა.

უკრაინული მხარის განცხადებით, საჰაერო თავდაცვამ 265 დრონი და 55 რაკეტა გაანეიტრალა. პირდაპირი დარტყმები 20 ადგილზე დაფიქსირდა. შეტევის ძირითადი მიმართულებები კიევისა და ლვოვის ოლქები იყო, თუმცა იერიშები განხორციელდა დნეპროპეტროვსკის, სუმის, ვინიცის, პოლტავის, მიკოლაევისა და ივანო-ფრანკივსკის რეგიონებზეც.

რუსეთის თავდაცვის სამინისტრო აცხადებს, რომ შეტევის სამიზნე სამხედრო აეროდრომები, სამხედრო-სამრეწველო საწარმოები და სამხედრო დანიშნულების ლოგისტიკური და სატელეკომუნიკაციო ცენტრები იყო. უწყებას მშვიდობიან მოსახლეობაში მსხვერპლისა და საცხოვრებელი სახლების დაზიანების შესახებ არაფერი უთქვამს.

თავდასხმამდე რამდენიმე საათით ადრე უკრაინის პრეზიდენტმა ვოლოდიმირ ზელენსკიმ მოსახლეობა მოსალოდნელი მასირებული იერიშის შესახებ გააფრთხილა და მოქალაქეებს საჰაერო განგაშის დროს თავშესაფრებში გადასვლისკენ მოუწოდა.

უკრაინის ხელისუფლება აცხადებს, რომ რუსული ბალისტიკური და ფრთოსანი რაკეტებისგან მოსახლეობის დასაცავად ქვეყანას დამატებითი საჰაერო თავდაცვის სისტემები და Patriot-ის რაკეტები სჭირდება.