ტაილანდელი მოგზაურისა და იუთუბერის, ჰლუნ სოლოს ოჯახი საზოგადოებას მის პოვნაში დახმარებას სთხოვს. ოჯახის ინფორმაციით, მასთან კავშირი 13 ივლისის შემდეგ ვეღარ დაამყარეს.
ჰლუნ სოლო საქართველოში მარტო მოგზაურობდა და თავისი YouTube-არხისთვის ვიდეოებს იღებდა. მისი ძმის განცხადებით, ოჯახი მას ვერც ტელეფონით და ვერც ინტერნეტის საშუალებით უკავშირდება.
ოჯახმა დახმარებისთვის ტაილანდის საგარეო საქმეთა სამინისტროს საკონსულო დეპარტამენტსაც მიმართა. უცნობია, რა მარშრუტით გადაადგილდებოდა მოგზაური და სად იმყოფებოდა ბოლოს.
ჰლუნ სოლოს YouTube-არხს 2.5 მილიონამდე გამომწერი ჰყავს. ოჯახი საქართველოში მყოფ მოქალაქეებს სთხოვს, მოგზაურის შესახებ ნებისმიერი ინფორმაცია მიაწოდონ.
