გელათის რეაბილიტაციის დროებითი კომიტეტი სამონასტრო კომპლექსში მიმდინარე საკონსერვაციო სამუშაოებთან დაკავშირებით განცხადებას ავრცელებს და ბოლო პერიოდში გავრცელებულ კრიტიკულ შეფასებებსა და ინფორმაციას დეზინფორმაციულ კამპანიად აფასებს.

კომიტეტის განმარტებით, ღვთისმშობლის შობის სახელობის კათედრალის დროებითი გადახურვის მასალა PVC ტიპის მაღალტექნოლოგიური ქსოვილია, რომელიც სამი თვის განმავლობაში სპეციალურად გელათისთვის გერმანიაში მზადდებოდა და საერთაშორისო საკონსერვაციო სტანდარტებს აკმაყოფილებს.

კომიტეტში აცხადებენ, რომ ერთიანი დროებითი გადახურვა 2020 წლიდან მსოფლიო მემკვიდრეობის ცენტრის ერთ-ერთი მთავარი მოთხოვნა იყო. მათივე ინფორმაციით, ქართველი და გერმანელი სპეციალისტების მიერ შემუშავებულმა პროექტმა მსოფლიო მემკვიდრეობის ცენტრის მაღალი შეფასება მიიღო.

განცხადებაში უარყოფილია ინფორმაცია, თითქოს ტაძრის ინტერიერში ფრესკების მასობრივი ცვენა მიმდინარეობს. კომიტეტის განცხადებით, ყველა კრიტიკული კერა დასტაბილურებულია და მიმდინარეობს გეგმური, ეტაპობრივი კონსერვაცია.

კომიტეტი ასევე განმარტავს, რომ დავით აღმაშენებლის დროინდელმა სადრენაჟე არხებმა ფუნქციონირება 1510 წელს, ოსმალთა მიერ მონასტრის გადაწვის შემდეგ შეწყვიტა და არქეოლოგიური გათხრების მიხედვით, სისტემა საუკუნეების განმავლობაში მიწით, ნაცრითა და ნახშირით იყო შევსებული.

განცხადებაში საუბარია ტაძრის მიკროკლიმატის კვლევაზეც, რომლის ავტორია იტალიელი პროფესორი დარიო კამუფო. კომიტეტის ინფორმაციით, ტაძარში გაზაფხულზე წარმოქმნილი კონდენსაციის პრობლემის ერთ-ერთ შესაძლო გადაწყვეტად იატაკის რეგულირებადი შეთბობა განიხილება. კომიტეტი ხაზს უსვამს, რომ ეს ჯერ მხოლოდ პირველადი სამუშაო ჰიპოთეზაა და დამატებით კვლევას საჭიროებს.

კომიტეტი განმარტავს Opificio delle Pietre Dure-სთან თანამშრომლობის საკითხსაც და აღნიშნავს, რომ „Pilot restoration“ გულისხმობს საპილოტე რესტავრაციას, რომლის დროსაც სრულმასშტაბიანი სამუშაოების დაწყებამდე მცირე მონაკვეთზე საკონსერვაციო მეთოდებისა და ხსნარების უსაფრთხოება მოწმდება.

განცხადებაში მოყვანილია ინფორმაცია გელათის მოზაიკის მდგომარეობაზეც. კომიტეტის ცნობით, კარლო ბაკურაძე ჯერ კიდევ 1989 წელს მიუთითებდა, რომ მოზაიკის კომპოზიციის 85% საფუძველს იყო მოშორებული. კომიტეტი აცხადებს, რომ ბაკურაძის მაშინდელი და რობერტო ნარდის ამჟამინდელი ანგარიშებით დაზიანების სიმძიმე პრაქტიკულად იდენტურია.

გელათის რეაბილიტაციის დროებითი კომიტეტი კრიტიკოსებს მოუწოდებს, თავი შეიკავონ მიმდინარე საკონსერვაციო სამუშაოების რეპუტაციული დაზიანებისა და საზოგადოების შეცდომაში შეყვანის მცდელობებისგან.

კომიტეტის განცხადებით, გელათის სამონასტრო კომპლექსში მიმდინარე საკონსერვაციო პროცესები უპრეცედენტოა მასშტაბით, სამეცნიერო სიღრმითა და საერთაშორისო ექსპერტთა ჩართულობით და სამუშაოები საერთაშორისო უმაღლეს სტანდარტებს შეესაბამება.