უკრაინამ რუსეთის ტერიტორიაზე მორიგი მასშტაბური შორ მანძილზე მოქმედი იერიში განახორციელა. სამარის ოლქში დარტყმის სამიზნე გახდა სარაკეტო-კოსმოსური ცენტრი „პროგრესი“, ხოლო ნიჟნი-ნოვგოროდის ოლქში - სავასლეიკის სამხედრო აეროდრომი. უკრაინის პრეზიდენტ ვოლოდიმირ ზელენსკის განცხადებით, „პროგრესზე“ შეტევისას უკრაინული წარმოების „ფლამინგოს“ ფრთოსანი რაკეტები გამოიყენეს.

„პროგრესი“ რუსეთის კოსმოსური სააგენტო „როსკოსმოსის“ ერთ-ერთი მნიშვნელოვანი საწარმოა და „სოიუზის“ ტიპის რაკეტების წარმოებაში მონაწილეობს. რუსეთის ადგილობრივმა ხელისუფლებამ სამარაში სამრეწველო ობიექტებზე ზიანისა და დაშავებულების შესახებ განაცხადა, თუმცა თავდაპირველად კონკრეტული საწარმო არ დაუსახელებია.

უკრაინული მხარის ინფორმაციით, დარტყმა განხორციელდა სავასლეიკის სამხედრო აეროდრომზეც, რომელიც უკრაინის საზღვრიდან დაახლოებით 700 კილომეტრში მდებარეობს. აეროდრომზე განთავსებულია რუსული სამხედრო ავიაცია, მათ შორის MiG-31-ის ტიპის თვითმფრინავები.

ამავე ღამეს უკრაინული დრონების შეტევები რუსეთის სხვა რეგიონებშიც დაფიქსირდა. მოსკოვის ოლქის ქალაქ შატურაში დრონი კერძო სახლს დაეცა და ორი ადამიანი, მათ შორის ცხრა წლის ბავშვი, დაშავდა. რუსეთის სხვადასხვა რეგიონში შეტევების გამო დროებით შეიზღუდა რამდენიმე აეროპორტის მუშაობაც.

რუსეთის თავდაცვის სამინისტროს განცხადებით, ღამის განმავლობაში ქვეყნის 19 რეგიონში, ასევე ანექსირებული ყირიმის, შავი და აზოვის ზღვების თავზე 598 უკრაინული დრონი გაანადგურეს ან გადაიტაცეს.