ფლორიდაში მცხოვრებმა 55 წლის პასტორმა სკოტ უინტერსმა OpenAI-სა და კომპანიის ხელმძღვანელ სემ ალტმანს სასამართლოში უჩივლა. მისი მტკიცებით, ChatGPT-ის მცდარმა სამედიცინო რჩევებმა ის სიკვდილის საფრთხის წინაშე დააყენა.
სარჩელის თანახმად, უინტერსი რამდენიმე კვირის განმავლობაში ჩატბოტს თავბრუსხვევისა და არტერიული წნევის ცვლილებების შესახებ ეკითხებოდა. მიუხედავად გაუარესებული მდგომარეობისა, ChatGPT მას სამედიცინო დახმარების მიღებისკენ არ მოუწოდებდა და სიმპტომებს არასწორად აფასებდა.
მოგვიანებით უინტერსს ორივე ფილტვში მრავლობითი თრომბის შედეგად მძიმე ფილტვის ემბოლია განუვითარდა. ექიმების შეფასებით, მდგომარეობის ერთ-ერთი მიზეზი ხანგრძლივი უმოძრაობა იყო.
ადვოკატების განცხადებით, ChatGPT პასუხებში პაციენტის რელიგიურ შეხედულებებსაც იყენებდა და დამამშვიდებელი, თავდაჯერებული ტონით არწმუნებდა, რომ გამოჯანმრთელდებოდა. მათი თქმით, ამან მას ჩატბოტზე სახიფათო დამოკიდებულება ჩამოუყალიბა და ოჯახის წევრების რჩევების მიუხედავად, საავადმყოფოში მისვლაზე უარი ათქმევინა.
უინტერსი კომპენსაციასა და OpenAI-სთვის დამატებითი უსაფრთხოების მექანიზმების დანერგვის დავალდებულებას ითხოვს.
OpenAI-ში აცხადებენ, რომ ChatGPT ექიმი არ არის და მისი გამოყენება სამედიცინო დიაგნოზის, მკურნალობის ან პროფესიული კონსულტაციის შემცვლელად არ უნდა მოხდეს.
