22 ივლისს, საღამოს, თბილისში, ვერაზე მომხდარი სროლის შედეგად დაჭრილი ოთხი ადამიანიდან ერთი არასრულწლოვანი კლინიკაში გარდაიცვალა. ექიმებმა მისი გადარჩენა ვერ შეძლეს.

შინაგან საქმეთა სამინისტროს განცხადებით, ბრალდებულმა ცეცხლსასროლი იარაღიდან გასროლით ოთხი პირი დაჭრა და შემთხვევის ადგილიდან მიიმალა. დაშავებულები კლინიკაში გადაიყვანეს, თუმცა ერთ-ერთი არასრულწლოვანი მიყენებული დაზიანებების შედეგად მალევე გარდაიცვალა.

უწყების ცნობით, დაკავებისას ბრალდებულმა სამართალდამცველებს შეიარაღებული წინააღმდეგობა გაუწია და ხელის თითებზე დაზიანება მიიღო. მას 20 წლამდე ან უვადო პატიმრობა ემუქრება.

სროლა აკაკი შანიძისა და აკაკი ხორავას ქუჩების კვეთაზე მოხდა. ადგილზე მობილიზებული იყო პოლიცია და სასწრაფო დახმარება, ტერიტორია კი შემოსაზღვრული ჰქონდა სამართალდამცველებს. რამდენიმე ნატყვიარი ეტყობოდა წითელ „ალფა რომეოს“.

თვითმხილველის ინფორმაციით, თავდამსხმელმა მანქანაში მჯდომ 17-18 წლის სამ ახალგაზრდას ცეცხლი გაუხსნა, შემდეგ კი ახლოს მყოფ ქალსაც ესროლა.