აშშ-ის ადმინისტრაციამ საუდის არაბეთთან ბირთვული თანამშრომლობის შეთანხმებას მოაწერა ხელი, რომელიც ქვეყანას მომავალში ბირთვული საწვავის გამდიდრების შესაძლებლობას აძლევს. შეთანხმების თანახმად, საუდის არაბეთის რეაქტორების მშენებლობასა და მომარაგებაში უპირატესობა ამერიკულ კომპანიებს მიენიჭებათ.

მხარეები ორი წლის განმავლობაში შეისწავლიან, რამდენად აუცილებელი და შესაძლებელი იქნება ურანის გამდიდრება უშუალოდ საუდის არაბეთის ტერიტორიაზე. პროცესს ამერიკული კომპანიები გააკონტროლებენ, ტექნოლოგია კი საუდის არაბეთს არ გადაეცემა.

შეთანხმება არ ითვალისწინებს სხვა მსგავსი პროექტებისთვის დამახასიათებელ სრულმასშტაბიან საერთაშორისო ინსპექციებს. კონტროლს ამერიკული ჯგუფები განახორციელებენ, რამაც ბირთვული იარაღის გაუვრცელებლობის სპეციალისტებისა და ამერიკელი კანონმდებლების შეშფოთება გამოიწვია.

კრიტიკოსები შიშობენ, რომ შეთანხმება სახიფათო პრეცედენტს შექმნის და ახლო აღმოსავლეთში ბირთვული შეიარაღების რბოლას შეუწყობს ხელს. განსაკუთრებით მწვავე რეაქცია მოჰყვა მას ისრაელში.

დოკუმენტი ახლა აშშ-ის კონგრესს გადაეგზავნება, რომელსაც მის განსახილველად 90 დღე ექნება. შეთანხმების ერთ-ერთი მთავარი ბენეფიციარი შესაძლოა ამერიკული კომპანია „ვესტინგჰაუსი“ გახდეს, რომელიც საუდის არაბეთისთვის სასურველ ბირთვულ რეაქტორებს აწარმოებს.