ირლანდიის სანაპიროზე პირველად აღმოაჩინეს გამორიყული გრენლანდიური ზვიგენი - დედამიწის ყველაზე ხანგრძლივად მცხოვრები ხერხემლიანი ცხოველი. დაახლოებით სამი მეტრის სიგრძის ზვიგენი, მეცნიერთა ვარაუდით, 150 წელზე მეტი ასაკის იყო, თუმცა ამ სახეობისთვის ის ახლად მომწიფებულად ითვლებოდა.
გრენლანდიურ ზვიგენებს 300-დან 500 წლამდე ცხოვრება შეუძლიათ. ისინი ჩრდილოეთ ატლანტიკასა და არქტიკის ცივ, ბნელ წყლებში ბინადრობენ, ნელა გადაადგილდებიან და ძირითადად ლეშითა და ზღვის ცხოველებით იკვებებიან.
გამოკვლევისას მეცნიერებმა ზვიგენის ორგანოებისა და ქსოვილების ნიმუშები აიღეს. მისი თვალის ბროლი ასაკის ზუსტად დასადგენად გამოიყენება. ახალმა კვლევებმა აჩვენა, რომ საუკუნეზე მეტი ასაკის მიუხედავად, გრენლანდიური ზვიგენის მხედველობა და გული ფუნქციონირებას ინარჩუნებს.
მეცნიერების ვარაუდით, სახეობის გამორჩეული სიცოცხლისუნარიანობა შესაძლოა დაზიანებული დნმ-ის აღდგენის უნარს უკავშირდებოდეს. ზვიგენის სიკვდილის ზუსტი მიზეზი ჯერ უცნობია, თუმცა კვლევა მეცნიერებს ამ იდუმალი სახეობის უკეთ შესწავლაში დაეხმარება.
