საქართველოს პროკურატურამ პირადი ცხოვრების საიდუმლოს უკანონოდ მოპოვების, შენახვისა და გავრცელების ბრალდებით ერთი პირი დააკავა.
უწყების ინფორმაციით, კახეთის საოლქო პროკურატურის საგამოძიებო სამმართველოს მიერ ჩატარებული გამოძიებით დადგინდა, რომ ბრალდებულმა დაზარალებულის პირადი ცხოვრების საიდუმლოს ამსახველი ფოტოსურათები უკანონოდ მოიპოვა და მობილურ ტელეფონში ინახავდა.
პროკურატურის ცნობით, მან აღნიშნული ფოტოები სოციალური ქსელის საშუალებით რამდენიმე პირსაც გაუგზავნა.
ბრალდებული 14 აგვისტოს დააკავეს. მას ბრალი სისხლის სამართლის კოდექსის 157¹ მუხლის პირველი ნაწილით წარედგინება, რაც პირადი ცხოვრების საიდუმლოს უკანონოდ მოპოვებას, შენახვასა და გავრცელებას გულისხმობს და 7 წლამდე თავისუფლების აღკვეთას ითვალისწინებს.
პროკურატურა სასამართლოს ბრალდებულის მიმართ აღკვეთის ღონისძიების სახით პატიმრობის გამოყენების შუამდგომლობით მიმართავს.
