უკრაინაზე რუსეთის მიერ განხორციელებული მასირებული საჰაერო შეტევის დროს პოლონეთის ტერიტორიაზე ამოუცნობი ობიექტი ჩამოვარდა და აფეთქდა. წინასწარი ინფორმაციით, შესაძლოა, ის რუსული ფრთოსანი რაკეტა ყოფილიყო.

ინციდენტი 30 ივლისს, გამთენიისას, ლუბლინის რეგიონში, სოფელ ტარნავა-კოლონიასთან მოხდა. ობიექტი დაუსახლებელ ტერიტორიაზე ჩამოვარდა. შემთხვევის შედეგად არავინ დაშავებულა და საცხოვრებელი შენობები არ დაზიანებულა. აფეთქების ადგილზე დაახლოებით ათი მეტრის სიგანის ორმო გაჩნდა.

პოლონეთის თავდაცვის მინისტრ ვლადისლავ კოსინიაკ-კამიშის განცხადებით, წინასწარი მონაცემები მიუთითებს, რომ ჩამოვარდნილი ობიექტი, დიდი ალბათობით, რუსული ფრთოსანი რაკეტაა. მისი ზუსტი ტიპისა და წარმომავლობის დასადგენად გამოძიება გრძელდება.

უკრაინის საგარეო საქმეთა მინისტრის მოვალეობის შემსრულებელმა ანდრი სიბიჰამ განაცხადა, რომ პოლონეთში რუსული Х-101 ტიპის რაკეტა ჩამოვარდა. რუსეთის ხელისუფლებას მომხდართან დაკავშირებით კომენტარი ჯერჯერობით არ გაუკეთებია.

პოლონეთის შეიარაღებული ძალების ინფორმაციით, ქვეყნის საჰაერო სივრცეში ამოუცნობი ობიექტი დაახლოებით 03:40 საათზე შენიშნეს. მის დასაკვირვებლად F-16 ტიპის გამანადგურებელი გაგზავნეს, თუმცა ექვს წუთში, ობიექტის იდენტიფიცირებამდე, ის რადარებიდან გაქრა.

სავარაუდო ჩამოვარდნის ადგილი მოგვიანებით სამხედრო ვერტმფრენმა აღმოაჩინა. ტერიტორიაზე სახმელეთო სამძებრო-სამაშველო ჯგუფებიც გაგზავნეს.

პოლონეთის თავდაცვის მინისტრმა გასული ღამე ქვეყნის საჰაერო თავდაცვისა და მონიტორინგის სისტემებისთვის „უკიდურესად მძიმედ“ შეაფასა.

ინციდენტი უკრაინაზე რუსეთის ფართომასშტაბიანი შეტევის ფონზე მოხდა. რუსეთმა უკრაინის სხვადასხვა რეგიონის მიმართულებით 70-ზე მეტი რაკეტა და 280-ზე მეტი დრონი გაუშვა. თავდასხმის ერთ-ერთი სამიზნე ლვოვიც იყო, რომელიც პოლონეთის საზღვრიდან დაახლოებით 70 კილომეტრში მდებარეობს. შეტევას უკრაინაში მსხვერპლი და ათობით დაშავებული მოჰყვა.

რუსული საჰაერო ობიექტების ნატოს წევრი სახელმწიფოების ტერიტორიაზე მოხვედრის შემთხვევები ბოლო დღეებში გახშირდა. 24-26 ივლისს რუმინეთის სამხედროებმა ქვეყნის საჰაერო სივრცეში შეჭრილი სამი სავარაუდო რუსული დრონი ჩამოაგდეს.