მოლდოვის ხელისუფლებამ 9 აგვისტოს დაგმო სოფელ კროკმაზთან მომხდარი აფეთქება, რომლის შედეგადაც ნამსხვრევები დიდ ტერიტორიაზე მიმოიფანტა. ხელისუფლების წინასწარი ინფორმაციით, საქმე შესაძლოა ე.წ. „სარაკეტო დრონს“ ეხებოდეს - მსგავსი ტიპის აპარატებს რუსეთი ბოლო პერიოდში სულ უფრო ხშირად იყენებს უკრაინის ოდესის რეგიონის მიმართულებით.

მოლდოვის პოლიციის ცნობით, დრონი უკრაინის საზღვართან მდებარე სოფლის გარეუბანში, ტყიან ტერიტორიაზე ხეს შეეჯახა. შემთხვევას მსხვერპლი არ მოჰყოლია.

პრეზიდენტმა მაია სანდუმ და პრემიერ-მინისტრმა ვასილე ტოფანმა ინციდენტი დაგმეს. სანდუს განცხადებით, „სწორედ რუსეთი აწარმოებს ამ აგრესიულ ომს და სრული პასუხისმგებლობა ეკისრება იმ საფრთხეზე, რომელიც მან ჩვენი ხალხის სახლებს შეუქმნა“.

თუმცა მოლდოვის ხელისუფლებას ამ ეტაპზე ოფიციალურად არ დაუდასტურებია, მოწყობილობა რუსული იყო თუ უკრაინული.

მოლდოვის პოლიცია აცხადებს, რომ გამოძიება მოწყობილობის ტიპის, წარმომავლობისა და ინციდენტის გარემოებების დასადგენად გრძელდება.

წინასწარი შეფასებით, აღმოჩენილ ფრაგმენტებს მართვადი რაკეტის კომპონენტების მსგავსი მახასიათებლები აქვს, რაც მიუთითებს, რომ შესაძლოა საქმე ე.წ. „სარაკეტო დრონს“ ეხებოდეს.

პოლიციის მიერ გამოქვეყნებულ ფოტოებსა და ფრაგმენტებზე დაყრდნობით, რადიო თავისუფლებასთან საუბრისას ექსპერტები ვარაუდობენ, რომ ეს რუსული „ბანდეროლის“ ტიპის მოწყობილობაა.

ფოტოებზე ჩანს მცირე ზომის რეაქტიული ძრავის ნაწილები - ჰაერის შემშვები როტორი, ლითონის წვის კამერა და გამონაბოლქვის მილი. მსგავსი ძრავა არ გამოიყენება პროპელერიან დრონებში, როგორიცაა Shahed-136/Geran-2, არც დიდ ფრთოსან რაკეტებში.

ერთ-ერთ ფრაგმენტზე კირილიცით იკითხება წარწერა - „КЕРОСИН ТС-1 95%“, რაც TS-1 ტიპის რეაქტიულ საწვავსა და ავზის შევსების დონეზე მიუთითებს.

მოლდოვის პოლიციის ინფორმაციით, „ბანდეროლის“ საბრძოლო ნაწილი დარტყმისას დიდ ტერიტორიაზე ნამსხვრევების გავრცელებას იწვევს.

ინციდენტის დროს უკრაინის სამხედრო ხელისუფლება აცხადებდა, რომ რუსეთი შავი ზღვიდან ოდესის რეგიონისკენ მსგავსი რეაქტიული დრონების გაშვებას აგრძელებდა. უკრაინის შეიარაღებული ძალების ცნობით, თავდასხმებისას რუსეთმა სხვადასხვა ტიპის დაახლოებით 100 დრონი გამოიყენა, მათ შორის რეაქტიული დრონები და „ბანდეროლის“ ტიპის საბრძოლო საშუალებები.

საჰაერო საფრთხის გამო უკრაინის ხელისუფლებამ დროებით შეაჩერა მოძრაობა მოლდოვის საზღვართან, მაიაკი-უდობნოეს მახლობლად მდებარე ხიდზე. მოლდოვის სასაზღვრო პოლიციამ მოქალაქეებს ოდესის ოლქში მოგზაურობისგან თავის შეკავებაც ურჩია.

უსაფრთხოების მოლდოველი ექსპერტი ანდრეი კურარაუ მიიჩნევს, რომ პოლიციის მიერ წარმოდგენილი მონაცემები „ბანდეროლის“ ტიპის უპილოტო საფრენ აპარატზე მიუთითებს. მისი შეფასებით, მოლდოვის ტერიტორიაზე დრონის ჩამოვარდნა დიდი ალბათობით შემთხვევითი იყო.

უკრაინის საზღვაო ძალების წარმომადგენლის, დიმიტრი პლეტენჩუკის განცხადებით, ივლისის შუა რიცხვებიდან რუსეთის არმია ოდესის რეგიონში „ბანდეროლის“ ტიპის საბრძოლო საშუალებებს სულ უფრო ხშირად იყენებს და ამ გზით ახალ ტაქტიკას ცდის.

კურარაუს შეფასებით, რუსეთი ცდილობს უკრაინის საჰაერო თავდაცვის სისტემაში არსებული სისუსტეები გამოიყენოს. რეაქტიული დრონები დაბალ სიმაღლეზე დაფრინავენ, მაღალი სიჩქარე აქვთ და მათი აღმოჩენა რთულია. ამასთან, მათ შეუძლიათ მეტი ასაფეთქებელი ნივთიერების ტარება და ჩვეულებრივ დრონებთან შედარებით უფრო დიდი ზიანის მიყენება.

ექსპერტის თქმით, ეს საფრთხეს მოლდოვისთვისაც ქმნის, რადგან ქვეყნის თავდაცვის სისტემას მსგავსი სწრაფი ობიექტების გადაჭერის შესაძლებლობა არ გააჩნია.

ზოგიერთ სპეციალიზებულ წყაროში „ბანდეროლს“ მისი მახასიათებლების გამო „მცირე ფრთოსან რაკეტასაც“ უწოდებენ.

„ბანდეროლი“ დაახლოებით 115 კილოგრამს იწონის, მისი სიგრძე 5 მეტრია, დიამეტრი - 30 სანტიმეტრი. აპარატი 520-650 კმ/სთ სიჩქარეს ავითარებს და დაახლოებით 500 კილომეტრის დაფარვა შეუძლია. მისი გაშვება „ორიონის“ ტიპის სხვა უპილოტო მოწყობილობებიდან ხდება.

მოლდოვის საგარეო საქმეთა სამინისტრომ ინციდენტი დაგმო და განაცხადა, რომ ის მოქალაქეების უსაფრთხოებას საფრთხეს უქმნის. უწყებამ მოლდოვის ელჩი ლილიანა დარია მოსკოვიდან „კონსულტაციებისთვის“ გამოიწვია.

პრეზიდენტმა მაია სანდუმ განაცხადა, რომ ინციდენტი რუსეთის ომის პირდაპირი შედეგია და რეგიონში ადამიანების სიცოცხლეს საფრთხეს უქმნის.

პრემიერ-მინისტრმა ვასილე ტოფანმაც აღნიშნა, რომ ქვეყანა განსაკუთრებით მკაცრი უნდა იყოს ყველაფერში, რაც მის საჰაერო სივრცეს ეხება.

მოლდოვის თავდაცვის სამინისტროს მონაცემებით, უკრაინაში ომის დაწყებიდან 2026 წლის ივლისის ბოლომდე ქვეყნის ტერიტორიაზე რაკეტებისა და დრონების 28 ფრაგმენტი იპოვეს, მათ შორის „გერბერებისა“ და „შაჰედების“.

9 აგვისტოს რუსეთის ძალები დრონებითა და რაკეტებით უტევდნენ ოდესის ოლქს, რომელიც მოლდოვას ესაზღვრება.

რუსეთის საგარეო საქმეთა სამინისტროს ოფიციალური წარმომადგენელი მარია ზახაროვა აცხადებს, რომ რუსი სამხედროები დრონების მარშრუტებად უკრაინის მოსაზღვრე ქვეყნების ტერიტორიებს არ იყენებენ.წყარო: რადიო თავისუფლება