ლა ლიგის 2026/27 წლების სეზონი განსაკუთრებული ინტერესით იწყება - მადრიდის „რეალში“ ჟოზე მოურინიო დაბრუნდა, „ბარსელონა“ კი ზედიზედ მესამე ჩემპიონობისთვის იბრძოლებს.

მადრიდულმა კლუბმა პორტუგალიელი სპეციალისტის დაბრუნება ზედიზედ ორი უტიტულო სეზონის შემდეგ გადაწყვიტა. მოურინიომ „რეალი“ პირველად 2010-2013 წლებში გაწვრთნა და მათ შორის, 2011/12 წლების სეზონში, გუნდი 100 ქულით ესპანეთის ჩემპიონი გახადა.

გასული სეზონი „რეალისთვის“ მძიმე გამოდგა. იანვარში კლუბი ჩაბი ალონსომ დატოვა, მოგვიანებით კი გუნდი ალვარო არბელოამ ჩაიბარა, თუმცა მადრიდელებმა სეზონი ტიტულის გარეშე დაასრულეს. ამ ფონზე კლუბში არაერთი შიდა პრობლემა და ფეხბურთელების მომავალთან დაკავშირებული გაურკვევლობაც არსებობდა.

ახალი სეზონის წინ „რეალმა“ შემადგენლობა მნიშვნელოვნად გააძლიერა. ვინისიუს ჟუნიორმა კლუბთან ახალი, ექვსწლიანი კონტრაქტი გააფორმა, ხოლო გუნდს შეუერთდნენ იან დიომანდე, მარკ კუკურელია, ბერნარდუ სილვა, იბრაჰიმა კონატე, დენზელ დუმფრისი და კარლოს ესპი. მოურინიოს ერთ-ერთი მთავარი ამოცანა კილიან მბაპეს, ვინისიუსისა და ჯუდ ბელინგემის შესაძლებლობების ერთ სისტემაში მაქსიმალურად გამოყენება იქნება.

მიუხედავად „რეალის“ გაძლიერებისა, სეზონის მთავარ ფავორიტად კვლავ „ბარსელონა“ მიიჩნევა. კატალონიელებმა ბოლო ორი ლა ლიგა მოიგეს და ჰანსი ფლიკის გუნდი ახლა ზედიზედ მესამე ჩემპიონობას უმიზნებს.

„ბარსელონას“ რობერტ ლევანდოვსკი და მარკუს რაშფორდი აღარ ჰყავს, თუმცა გუნდს ენტონი გორდონი და კარიმ ადეიემი შეუერთდნენ. მთავარი ყურადღება კვლავ ლამინ იამალზე იქნება, რომელმაც მსოფლიო ჩემპიონატის შემდეგ კლუბს მსოფლიო ჩემპიონის სტატუსით დაუბრუნდა. 19 წლის ფეხბურთელი კატალონიელთა შეტევის ერთ-ერთ მთავარ ლიდერად რჩება.

საინტერესო ცვლილებებია სხვა კლუბებშიც. „ატლეტიკო“ ანტუან გრიზმანის გარეშე იწყებს ახალ ეპოქას, ხოლო დიეგო სიმეონე გუნდს უკვე მე-15 სრულ სეზონში უხელმძღვანელებს. ლა ლიგაში დაბრუნდნენ „რასინგ სანტანდერი“, „დეპორტივო“ და „მალაგაც“.

სეზონის პირველი „ელ კლასიკო“ ოქტომბრის ბოლოს „კამპ ნოუზე“ გაიმართება და შესაძლოა სწორედ ეს მატჩი გახდეს ჩემპიონობისთვის ბრძოლის ერთ-ერთი პირველი მნიშვნელოვანი გამოცდა.