ამერიკული ავტომწარმოებელი Tesla ევროპაში თავისი ავტომატიზებული მართვის სისტემის, Full Self-Driving-ის (FSD), დამტკიცებას ცდილობს. Reuters-ის ჟურნალისტური გამოძიების თანახმად, კომპანია მარეგულირებლებზე ზეწოლას ახდენს და სისტემის უსაფრთხოების შესახებ კვლევებს იყენებს, რომელთა სანდოობას დამოუკიდებელი ექსპერტები ეჭვქვეშ აყენებენ.
Reuters-მა შეისწავლა Tesla-სა და ევროპის სხვადასხვა ქვეყნის მარეგულირებლებს შორის ასობით გვერდის მიმოწერა. დოკუმენტების მიხედვით, კომპანიამ ნიდერლანდების მარეგულირებელს არაერთხელ მოსთხოვა უსაფრთხოების შემოწმების პროცესის გამარტივება და ხარჯების შემცირება. ზოგიერთ მოთხოვნაზე მარეგულირებელი დათანხმდა.
ნიდერლანდებმა სისტემას პირველმა მისცა მნიშვნელოვანი თანხმობა, რაც ევროკავშირის მასშტაბით დამტკიცების პროცესს უხსნის გზას. ეროვნული ნებართვები კიდევ შვიდმა ქვეყანამ გასცა, თუმცა საბოლოო გადაწყვეტილებას ევროკავშირის წევრი სახელმწიფოები მიიღებენ.
Reuters-ის მიერ გამოკითხული შვიდივე საგზაო უსაფრთხოების მკვლევარი აცხადებს, რომ Tesla-ს კვლევები ვერ ადასტურებს კომპანიის მთავარ მტკიცებას, თითქოს FSD სასიკვდილო ავტოსაგზაო შემთხვევებს ამცირებს.
მკვლევრების შეფასებით, კომპანიამ ერთმანეთთან არასათანადოდ შეადარა პროფესიონალი ტესტ-მძღოლებისა და ჩვეულებრივი მძღოლების მონაცემები. ამასთან, ავარიების ნაცვლად გამოიყენა ისეთი მაჩვენებლები, როგორიცაა მკვეთრი დამუხრუჭება, სიგნალის გამოყენება და სწრაფი აჩქარება.
ილონ მასკი ამტკიცებს, რომ სისტემის დამტკიცების გაჭიანურება ადამიანების სიცოცხლეს საფრთხეს უქმნის. Tesla-მ მხარდამჭერებსაც მოუწოდა, მარეგულირებლებისგან გადაწყვეტილების დაჩქარება მოეთხოვათ.
ნიდერლანდების მარეგულირებელი RDW ზეწოლის შედეგად გადაწყვეტილების მიღებას უარყოფს და აცხადებს, რომ შეფასება დამოუკიდებლად და ობიექტურად ჩაატარა. Tesla-ს Reuters-ის დეტალურ კითხვებზე პასუხი არ გაუცია.
აღსანიშნავია, რომ Full Self-Driving სრულად ავტონომიური მართვის სისტემა არ არის. მისი გამოყენებისას მძღოლი ვალდებულია, მუდმივად აკონტროლოს მოძრაობა და საჭიროების შემთხვევაში მართვა გადაიბაროს.
