ბიზნესმენი თამაზ ელიზბარაშვილი ციხიდან გამოქვეყნებულ წერილში პროკურორს საპროცესო შეთანხმების გაფორმებას სთხოვს.

განცხადება მის პირად ფეისბუქგვერდზე გამოქვეყნდა. წერილში ელიზბარაშვილი „TV იმედის“ თანამშრომლების მიმართ მუქარას აღიარებს და აღნიშნავს, რომ 31 აგვისტოს გამოქვეყნებულ ფეისბუქლაივში შვიდ თანამშრომელს საჯაროდ დაემუქრა.

მისივე თქმით, ამას წინ უძღოდა 30 აგვისტოს რესტორან „სხვაში“ მომხდარი დაპირისპირება. ელიზბარაშვილი აცხადებს, რომ „TV იმედის“ თანამშრომლები მას ფიზიკურად შეეხნენ და მის მეუღლეს შეურაცხყოფა მიაყენეს.

„დიახ, საჯაროდ, ჩემი ფეისბუქგვერდიდან დავემუქრე „TV-იმედის“ შვიდივე თანამშრომელს“, - წერს ელიზბარაშვილი და პროკურატურას მიმართავს, რომ მის მიმართ საპროცესო შეთანხმება გაფორმდეს.

„მე არ დავიწყებ ჩემ თავზე საუბარს, ვინ ვარ და რა გამიკეთებია ჩემი ქვეყნისთვის. მხოლოდ ერთს გეტყვით, იმდენი დამსახურება მაინც მაქვს, რომ გამიფორმოთ საპროცესო შეთანხმება“, - ნათქვამია წერილში.

საქართველოს პროკურატურამ თამაზ ელიზბარაშვილს მუქარის ფაქტზე ბრალდება წარუდგინა.

გამოძიების ვერსიით, 30 აგვისტოს თბილისის ერთ-ერთ რესტორანში ელიზბარაშვილსა და დაზარალებულებს შორის სოციალურ ქსელში დაწერილი კომენტარის გამო სიტყვიერი კონფლიქტი მოხდა. პროკურატურა აცხადებს, რომ ელიზბარაშვილი მათ სიცოცხლის მოსპობითა და ჯანმრთელობის დაზიანებით დაემუქრა, მოგვიანებით კი შეიარაღებული დაბრუნდა და რესტორანში შეჭრას ცდილობდა.

უწყების ცნობით, 31 აგვისტოს მან სოციალურ ქსელში ვიდეომიმართვაც გამოაქვეყნა, სადაც მუქარა გააგრძელა.

თამაზ ელიზბარაშვილს აღკვეთის ღონისძიების სახით პატიმრობა აქვს შეფარდებული.