შინაგან საქმეთა სამინისტრომ „კავკასიის უნივერსიტეტში“ სტუდენტების სავარაუდო ინტოქსიკაციის ფაქტზე გამოძიება დაიწყო.
როგორც შსს-ში რადიო თავისუფლებას განუცხადეს, გამოძიება სისხლის სამართლის კოდექსის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.
საქმე ეხება 5 ოქტომბრის ღამეს სოციალურ ქსელებში გავრცელებულ ინფორმაციას, რომლის მიხედვითაც, უნივერსიტეტში პირველკურსელებისთვის გამართულ წვეულებაზე რამდენიმე სტუდენტი, სავარაუდო ინტოქსიკაციით, კლინიკაში გადაიყვანეს. პოსტებში ასევე ვრცელდებოდა ვერსია, რომ სტუდენტები შესაძლოა სასმელში გარეული უცნობი ნივთიერებით მოწამლულიყვნენ.
„კავკასიის უნივერსიტეტის“ საზოგადოებასთან ურთიერთობის სამსახურის წარმომადგენლის, თამთა ბუთხუზის ინფორმაციით, კლინიკაში ალკოჰოლური თრობით 4 სტუდენტი გადაიყვანეს და ოთხივე უკვე გაწერილია.
მისივე თქმით, სოციალურ ქსელებში გავრცელებული ინფორმაციის მნიშვნელოვანი ნაწილი გადაუმოწმებელია. უნივერსიტეტში აცხადებენ, რომ ღონისძიებაზე ჯანმრთელობის მძიმე დაზიანების ან სხვა ინციდენტის შემთხვევა არ დაფიქსირებულა.
ბუთხუზის ინფორმაციით, შსს-მ გამოყენებული სასმლის ნიმუშები აიღო და მათზე შესაბამისი კვლევა ჩატარდება.
სტუდენტები ალადაშვილის სახელობის კლინიკასა და „ჰელსიკორში“ იყვნენ გადაყვანილები. „ჰელსიკორში“ რადიო თავისუფლებას დაუდასტურეს, რომ პაციენტები უკვე გაწერილები არიან, თუმცა მათი ჯანმრთელობის მდგომარეობის შესახებ დამატებითი ინფორმაცია არ გაუციათ.
