ესპანეთის კატალონიის რეგიონში ძლიერი წვიმისა და წყალდიდობის შედეგად ორი ადამიანი დაიღუპა, კიდევ ერთი კი დაკარგულად ითვლება. ამის შესახებ ადგილობრივმა ხელისუფლებამ კვირას განაცხადა.

კატალონიის მთავრობის ხელმძღვანელმა სალვადორ ილიამ სოციალურ ქსელში დაადასტურა, რომ ბარსელონას ჩრდილოეთით მდებარე ქალაქ ტორდერაში კედლის ჩამონგრევის შედეგად ერთი მამაკაცი დაიღუპა.

მეხანძრეების ინფორმაციით, კიდევ ერთი ადამიანი დაიღუპა მონტორნეს-დელ-ვალიესში. საგანგებო სამსახურები ამ დროისთვის ეძებენ დაკარგულ ადამიანს პინედა-დე-მარში, რომელიც ბარსელონიდან დაახლოებით 52 კილომეტრით ჩრდილოეთით მდებარეობს.

კატალონიის ხელისუფლებამ წითელი დონის განგაში გამოაცხადა და მოსახლეობას მოუწოდა, შაბათს საღამოს 8 საათიდან კვირას დღის 2 საათამდე სახლებში დარჩენილიყვნენ. გაფრთხილების მიზეზი იყო პროგნოზი, რომლის მიხედვითაც რეგიონს შესაძლოა ე.წ. „მინი-ქარიშხალი“ დასტყდომოდა და ძლიერი წვიმა გაგრძელებულიყო.

შაბათს კოკისპირული წვიმის შედეგად დაიტბორა სახლები, ხოლო ბარსელონასთან ახლოს, ბელვიტხესა და კორნელიაში, ავტომობილები წყალში აღმოჩნდა. ბარსელონას ავტომაგისტრალებზე დაგროვილ დიდ გუბეებში იხვებიც კი დაცურავდნენ.

კატალონიის რეგიონული მეტეოროლოგიური სამსახურის Meteocat-ის დირექტორმა, სარაი საროკამ, შაბათს განაცხადა, რომ განსაკუთრებული მეტეოროლოგიური სისტემის ცენტრი ხმელთაშუა ზღვის თავზე იმყოფებოდა და არსებობდა ალბათობა, რომ ე.წ. „მინი-ქარიშხალი“ კატალონიის ტერიტორიაზე გადმოსულიყო.

ადგილობრივი მედიის ინფორმაციით, ბარსელონას აეროპორტში რამდენიმე რეისი გაუქმდა ან გადაიდო.

ძლიერმა წვიმამ ადგილობრივი სარკინიგზო მიმოსვლაც დააზარალა. მაღაზიების ნაწილი ადრე დაიკეტა, გაუქმდა საფეხბურთო მატჩები, ხოლო ბარსელონას „ლისეუს“ ოპერის თეატრში ვერდის „აიდას“ წარმოდგენა აღარ გაიმართა.