მოლდოვაში საჰაერო სივრცის ექვსი დარღვევა დაფიქსირდა. ინფორმაციას ქვეყნის თავდაცვის სამინისტრო ავრცელებს.

უწყების ცნობით, 3 ოქტომბერს მოლდოვის საჰაერო სივრცეში მეექვსე არასანქცირებული შეჭრა დილით, უკრაინის წინააღმდეგ რუსეთის მასიური თავდასხმის ფონზე მოხდა.

თავდაცვის სამინისტროს განცხადებით, დრონი მონაცემთა ანალიზის პროცესში აღმოაჩინეს.

უწყების ინფორმაციით, საფრენი აპარატი მოლდოვის საჰაერო სივრცეში 08:04 საათზე, უკრაინის ოდესის ოლქის სოფელ უდობნოეს მიმართულებიდან შევიდა, ხოლო ერთი წუთის შემდეგ, 08:05 საათზე, მოლდოვის ტერიტორია დატოვა და უკრაინული ქალაქ ბელიაევკას მიმართულებით გაფრინდა.

ეს მოლდოვის საჰაერო სივრცის იმ დღის მეექვსე დარღვევა იყო.

მანამდე, 07:45-დან 08:00 საათამდე, ქვეყნის საჰაერო სივრცის კიდევ ხუთი დარღვევა დაფიქსირდა. თავდაცვის სამინისტროს ცნობით, ინციდენტებში სამი რაკეტა და ორი დრონი იყო ჩართული.

უწყების ინფორმაციით, მათი ნამსხვრევები მოლდოვის ოთხ რაიონში ჩამოვარდა.