მარნეულისა და ჰუჯაბის ეპისკოპოსი გიორგი ჯამდელიანი გიორგი დავითაძის მიმართ სავარაუდო სექსუალური ძალადობის შესახებ გავრცელებულ ინფორმაციას გამოეხმაურა და დამოუკიდებელი, მიუკერძოებელი და გამჭვირვალე გამოძიება მოითხოვა.
მისი განცხადებით, პატიმრობა ადამიანის ღირსებისა და ფუნდამენტური უფლებების შელახვას არ ნიშნავს და ნებისმიერი ადამიანი დაცული უნდა იყოს ძალადობისა და არაადამიანური მოპყრობისგან.
„თუ პატიმრის მიერ გაკეთებული განცხადებები დადასტურდება, საქმე გვექნება ადამიანის უფლებების მძიმე დარღვევასთან და შესაბამისმა პირებმა უმკაცრესად უნდა აგონ პასუხი“, - წერს ეპისკოპოსი.
მისივე თქმით, ამ საქმეში მთავარი სიმართლის დადგენა და პატიმრის უფლებებისა და ღირსების დაცვა უნდა იყოს.
„2012 წლის გამოცდილებამ გვაჩვენა, რამდენად მძიმე შედეგი შეიძლება მოჰყვეს ძალადობის უგულებელყოფას ან დამალვას“, - აცხადებს გიორგი ჯამდელიანი.
გიორგი დავითაძე აცხადებს, რომ №6 პენიტენციურ დაწესებულებაში მასზე სექსუალურად იძალადეს და შემთხვევა დეესკალაციის ოთახში მოხდა. სპეციალური პენიტენციური სამსახური ბრალდებას უარყოფს და აცხადებს, რომ დავითაძის მიმართ „არათუ სექსუალური, არამედ არანაირი სახის ძალადობას არ ჰქონია ადგილი“.
