ეთან ჰოუკი ამბობს, რომ მისი თითქმის 40-წლიანი კარიერის განმავლობაში ყველაზე მნიშვნელოვანი როლი 2001 წლის ფსიქოლოგიურ დრამა „Tape“-ში შეასრულა.
BBC-სთან ინტერვიუში მსახიობმა თქვა, რომ რიჩარდ ლინკლეიტერის დაბალბიუჯეტიანმა ფილმმა ის „ზრდასრულ მსახიობად“ აქცია და მის კარიერაში გარდამტეხი აღმოჩნდა.
„Tape“ ექვს დღეში, ხელის ციფრული კამერებით გადაიღეს და მოქმედება თითქმის მთლიანად ერთ მოტელის ოთახში ვითარდება. ჰოუკთან ერთად ფილმში უმა თურმანი და რობერტ შონ ლეონარდი მონაწილეობენ. ჰოუკი ნარკოტიკების მცირე დილერ ვინსს თამაშობს, რომელიც ძველი მეგობრისგან წარსულში მომხდარ სავარაუდო გაუპატიურებაზე აღიარებას ფარულად იწერს.
ჰოუკის თქმით, სწორედ ამ ფილმზე მუშაობამ მისცა ის თავდაჯერება, რომელიც მოგვიანებით „Training Day“-ში დენზელ ვაშინგტონთან მუშაობისას დასჭირდა. ამ როლისთვის მსახიობმა „ოსკარის“ პირველი ნომინაციაც მიიღო.
ჰოუკისა და ლინკლეიტერის თანამშრომლობა უკვე სამი ათწლეულია გრძელდება და ცხრა ფილმს მოიცავს, მათ შორისაა „Before Sunrise“, „Before Sunset“, „Before Midnight“ და 2025 წლის „Blue Moon“.
მსახიობის ახალი ფილმია „The Weight“, რომელშიც ის პატიმარ მერფის განასახიერებს. დიდი დეპრესიის პერიოდში განვითარებულ ისტორიაში მისი გმირი თავისუფლების სანაცვლოდ ორეგონის ველურ ბუნებაში ოქროს გადატანას თანხმდება. ფილმში ასევე მონაწილეობს რასელ ქროუ.
ჰოუკის თქმით, ხანგრძლივი კარიერის მიუხედავად, კვლავ ეძებს როლებსა და პროექტებს, რომლებიც მას ახალი მიმართულებით განვითარების საშუალებას მისცემს.
„რაც უფრო მეტს სწავლობ, მით უფრო მეტად ხვდები, რამდენი რამ არ იცოდი“, - ამბობს მსახიობი.
