რუსეთის არმიამ ავიაბომბებით შეუტია ხარკოვის სლობოდსკისა და ნემიშლიანის რაიონებს. საოლქო ადმინისტრაციის ხელმძღვანელის, ოლეჰ სინეჰუბოვის ინფორმაციით, დაიღუპა 66 და 80 წლის ორი ქალი, დაშავდა სულ მცირე 32 ადამიანი, მათ შორის ორი ბავშვი.

დარტყმების შედეგად დაზიანდა 20-მდე საცხოვრებელი სახლი, საოფისე შენობები, სასწავლო დაწესებულება და ავტომობილები. ადგილზე საგანგებო სამსახურები მუშაობენ.

იმავე დღეს უკრაინის პრეზიდენტმა ვოლოდიმირ ზელენსკიმ Financial Times-თან ინტერვიუში განაცხადა, რომ რუსეთი შესაძლოა უახლოეს პერიოდში უკრაინის სამოქალაქო ობიექტებზე დარტყმების გაძლიერებას გეგმავდეს, განსაკუთრებით კიევში, ხარკოვში, ოდესასა და ლვოვში.

The New York Times-ი უკრაინის დაზვერვის მიერ ხელში ჩაგდებულ დოკუმენტზე დაყრდნობით წერს, რომ ზამთარში რუსეთის ძალები ენერგეტიკულ და წყალმომარაგების ინფრასტრუქტურაზე თავდასხმებს გეგმავენ.

დოკუმენტის მიხედვით, მიზანია ელექტროენერგიის გამომუშავების მკვეთრი შემცირება და მსხვილი ქალაქების ელექტროენერგიის გარეშე დატოვება, რამაც შესაძლოა ჰუმანიტარული კრიზისი გამოიწვიოს.