ტენესის შტატში სიკვდილმისჯილი 50 წლის კრისტა პაიკი უგონო მდგომარეობაშია და ხელოვნური სუნთქვის აპარატზე იმყოფება მას შემდეგ, რაც სასიკვდილო ინექციით მისი სიკვდილით დასჯა ვერ მოხერხდა.

პაიკს ოთხშაბათს პენტობარბიტალის ორი სასიკვდილო დოზა გაუკეთეს, თუმცა ის ცოცხალი დარჩა და საავადმყოფოში გადაიყვანეს. მისი მდგომარეობა კრიტიკულია.

ადვოკატების განცხადებით, სასჯელის აღსრულებისას თანამშრომლებმა ინტრავენური კათეტერის ჩადგმა სულ მცირე შვიდჯერ სცადეს. მათი მტკიცებით, ინექციის დროს პაიკი ტიროდა და კვნესოდა. დაცვის მხარე ვარაუდობს, რომ პრეპარატი სათანადოდ ვერ მოხვდა სისხლძარღვში.

ანესთეზიოლოგ ჯოელ ზივოტის შეფასებით, პენტობარბიტალის ორი დოზა პაიკის სისხლის მიმოქცევაში სრულად რომ მოხვედრილიყო, ის უნდა გარდაცვლილიყო. ექიმის ვარაუდით, პრეპარატის ნაწილი შესაძლოა დაზიანებული ვენიდან კანქვეშა ქსოვილში მოხვდა. პაიკს ასევე აქვს თრომბოციტოზი, რაც, შესაძლოა, პროცესზე გავლენას ახდენდა.

ტენესის გუბერნატორმა ბილ ლიმ შემთხვევის დამოუკიდებელი გამოძიება მოითხოვა და მიმდინარე წლის განმავლობაში შტატში ყველა სიკვდილით დასჯა შეაჩერა. პაიკის ადვოკატები კი სასამართლოს სთხოვენ, საქმესთან დაკავშირებული ყველა მტკიცებულება დაცული იყოს და მისი სასიკვდილო განაჩენი შეიცვალოს.

ჯერჯერობით უცნობია, შეეცდებიან თუ არა ხელისუფლების წარმომადგენლები პაიკის სიკვდილით დასჯას ხელახლა.

კრისტა პაიკს სიკვდილით დასჯა 1996 წელს მიუსაჯეს. ის 18 წლის იყო, როდესაც 1995 წელს თავის მაშინდელ მეგობარ ტადარილ შიპთან ერთად 19 წლის კოლინ სლემერი აწამა და მოკლა. შიპი დანაშაულის დროს 17 წლის იყო და სიკვდილით დასჯას გადაურჩა. მას უვადო პატიმრობა აქვს მისჯილი პირობით ვადამდე გათავისუფლების შესაძლებლობით.