ნორვეგიამ და კანადამ დაახლოებით 7,7 მილიონი დოლარი გამოყვეს რუსეთის მიერ დეპორტირებული ან იძულებით გადაადგილებული უკრაინელი ბავშვების დაბრუნებისა და რეინტეგრაციისთვის.
ინფორმაციას Bring Kids Back ავრცელებს კანადაში გამართული Pathways to Peace კონფერენციის შემდეგ.
ნორვეგიამ დაახლოებით 2,6 მილიონი დოლარი გამოყო UNICEF-ისა და წითელი ჯვრის საერთაშორისო კომიტეტისთვის ბავშვების მოძიების, დაბრუნებისა და რეინტეგრაციის პროგრამებზე.
კანადამ სექტემბერში ამავე მიზნებისთვის დაახლოებით 4,5 მილიონი დოლარის გამოყოფის შესახებ განაცხადა, კონფერენციის შემდეგ კი დამატებით 600 ათასი დოლარის დახმარებაც დააანონსა. თანხის ნაწილი მოხმარდება მათ შორის იმ ადამიანებსა და ბავშვებს, რომლებმაც რუსეთის სამხედროების მხრიდან სექსუალური ძალადობა გადაიტანეს და ოკუპაციიდან დაბრუნდნენ.
კონფერენციაზე ჰონდურასი ოფიციალურად შეუერთდა ბავშვთა დაბრუნების საერთაშორისო კოალიციას, რომელშიც ახლა 52 სახელმწიფო და საერთაშორისო ორგანიზაციაა გაერთიანებული.
კიდევ ორი ქვეყანა შეუერთდა Safe Pathways Home-ის ინიციატივას და მათი ტერიტორია უკრაინელი ბავშვებისა და ტყვეების დაბრუნებისთვის ტრანზიტულ ზონად შეიძლება იქნეს გამოყენებული. ქვეყნების სახელები საჯაროდ არ დასახელებულა.
1 ოქტომბერს დიდმა ბრიტანეთმა სანქციები დაუწესა პირებს, რომლებიც უკრაინელი მშვიდობიანი მოქალაქეების წამებასა და ბავშვების დეპორტაციასა და იდეოლოგიურ ხელახალ აღზრდაში მონაწილეობდნენ. მანამდე ევროკავშირმა სანქციების სიაში 10 ფიზიკური პირი და რუსეთის 17 სტრუქტურა შეიყვანა.
უკრაინის ხელისუფლების მონაცემებით, 2022 წლიდან რუსეთმა ოკუპირებული ტერიტორიებიდან 20 000-ზე მეტი ბავშვი იძულებით გადაიყვანა ან დეპორტაცია მოახდინა. 2026 წლის სექტემბრის ბოლოსთვის უკრაინის ხელისუფლებამ და Bring Kids Back-ის ინიციატივამ 2 651 ბავშვის დაბრუნება შეძლეს.
