არასამთავრობო ორგანიზაციები პატიმარ გიორგი დავითაძის მიმართ სავარაუდო სექსუალური ძალადობისა და არასათანადო მოპყრობის ფაქტებზე დაუყოვნებლივ, დამოუკიდებელ და ეფექტიან გამოძიებას მოითხოვენ.

გიორგი დავითაძემ სააპელაციო სასამართლოში განაცხადა, რომ №6 პენიტენციური დაწესებულების „ბადრაგმა გააუპატიურა“ და, მისი თქმით, დანაშაულს 10-მდე თანამონაწილე ჰყავს.

სპეციალური პენიტენციური სამსახური ბრალდებას კატეგორიულად უარყოფს, მას „სრულ სიცრუესა“ და დავითაძეების ოჯახის მიერ პენიტენციური სისტემის დისკრედიტაციის მცდელობას უწოდებს.

არასამთავრობო ორგანიზაციების განცხადებით, პენიტენციური სამსახურის მიერ გავრცელებული ვიდეოკადრები და განმარტებები ბრალდებებზე სათანადო პასუხს არ წარმოადგენს და დამოუკიდებელ გამოძიებას ვერ ჩაანაცვლებს.

ორგანიზაციები ითხოვენ დადგინდეს, რატომ გადაიყვანეს დავითაძე დეესკალაციის საკანში, რატომ შევიდა იქ დაახლოებით ათი თანამშრომელი, ვინ იყვნენ ისინი და რა მოქმედებები განახორციელეს. ასევე უნდა შემოწმდეს, არის თუ არა გავრცელებული ვიდეო 2025 წლის 21 დეკემბრის მოვლენების სრული და უწყვეტი ჩანაწერი და არსებობს თუ არა სხვა კამერების მასალებიც.

განცხადების ავტორები მოითხოვენ ყველა ვიდეოჩანაწერისა და სხვა მტკიცებულებების დაცვას, დავითაძის დამოუკიდებელ სამედიცინო და სასამართლო-სამედიცინო შემოწმებას, საქმეში მონაწილე თანამშრომლების ინდივიდუალურად გამოკითხვას და პატიმრის, მისი ოჯახის წევრებისა და შესაძლო მოწმეების დაცვას ზეწოლისგან.

მათი განცხადებით, გამოძიებამ უნდა დაადგინოს როგორც შესაძლო უშუალო შემსრულებლების, ისე იმ თანამდებობის პირების პასუხისმგებლობა, რომლებმაც შესაძლოა ძალადობასთან დაკავშირებული ბრძანება გასცეს, მის შესახებ იცოდნენ ან მისი პრევენცია ვერ უზრუნველყვეს.

არასამთავრობოები ხაზს უსვამენ, რომ თუ პატიმრის მიმართ აღწერილი ძალადობა დადასტურდება, საქმე შეიძლება შეეხებოდეს არა მხოლოდ სექსუალური ხასიათის მძიმე დანაშაულს, არამედ წამების აკრძალვის საწინააღმდეგო მოპყრობასაც.

განცხადებას ხელს აწერენ „საერთაშორისო გამჭვირვალობა - საქართველო“, საქართველოს ახალგაზრდა იურისტთა ასოციაცია, „საფარი“, სოციალური სამართლიანობის ცენტრი, სამოქალაქო საზოგადოების ფონდი, ISFED, IDFI, DRI და სხვა ორგანიზაციები.