აშშ-უკრაინის აღდგენის საინვესტიციო ფონდმა კრიტიკული მინერალების სფეროში პირველი შეთანხმება გააფორმა. ინფორმაციას Reuters-ი აშშ-ის მაღალჩინოსანზე დაყრდნობით ავრცელებს.

აშშ-ის საერთაშორისო განვითარების საფინანსო კორპორაციის საინვესტიციო მიმართულების ხელმძღვანელის, კონორ კოულმენის განცხადებით, ფონდის პროექტების საერთო მოცულობა ამ ეტაპზე დაახლოებით 70 მილიონ დოლარს შეადგენს.

კრიტიკული მინერალების მიმართულებით გაფორმებული პირველი შეთანხმება დაახლოებით 30 მილიონი დოლარის ინვესტირებას ითვალისწინებს. პროექტი უკრაინულ BGV Group-თან ერთობლივი საინვესტიციო პლატფორმის შექმნას გულისხმობს.

კოულმენის თქმით, საწყის ეტაპზე ყურადღება უკრაინის მასშტაბით ადრეული სტადიის სამთო-მოპოვებით პროექტებზე გამახვილდება. მათ შორისაა იშვიათი მიწის ელემენტების, ურანის, ბერილიუმისა და ცირკონიუმის საბადოები.

ფონდის ორი სხვა პროექტი უკრაინის ენერგეტიკული ინფრასტრუქტურის გაძლიერებას უკავშირდება. მათი მიზანია ზამთრის მოახლოების ფონზე ელექტროენერგიისა და გათბობის სისტემების მდგრადობის გაზრდა, განსაკუთრებით რუსეთის მხრიდან კრიტიკულ ინფრასტრუქტურაზე განხორციელებული შეტევების პირობებში.

აშშ-მა და უკრაინამ მინერალების შესახებ სტრატეგიულ შეთანხმებას ხელი 2025 წლის აპრილში მოაწერეს. სწორედ ამ შეთანხმების ფარგლებში შეიქმნა ერთობლივი აღდგენის საინვესტიციო ფონდი, რომელიც მინერალების გარდა ენერგეტიკის, ინფრასტრუქტურისა და სხვა სტრატეგიულ სფეროებშიც ახორციელებს ინვესტიციებს.