ირკუტსკის ოლქში რამდენიმე სამედიცინო დაწესებულება კარანტინზე დაიხურა, ქალაქ შელიხოვში მდებარე ალუმინის ქარხანაში კი თანამშრომლებისთვის პირბადის ტარება სავალდებულო გახდა. შეზღუდვები მას შემდეგ დაწესდა, რაც შელიხოვის საავადმყოფოში ახალგაზრდა ქალი გარდაიცვალა. არაოფიციალური ინფორმაციით, მისი გარდაცვალების შესაძლო მიზეზად ფილტვის შავი ჭირი სახელდება, თუმცა ხელისუფლება და შესაბამისი უწყებები ამ დიაგნოზს ოფიციალურად არ ადასტურებენ.

ირკუტსკის ალუმინის ქარხნის გენერალურმა დირექტორმა არტიომ ფომინიხმა ტელეგრამში დაწერა, რომ საწარმოში პროფილაქტიკის მიზნით პირბადეების რეჟიმი შემოიღეს.

მისივე ინფორმაციით, ირკუტსკის ოლქში რუსეთის ფედერაციის მთავარი სახელმწიფო სანიტარიული ექიმის, ანა პოპოვას მონაწილეობით სანიტარიულ-ეპიდსაწინააღმდეგო კომისიის სხდომები გაიმართა. „როსპოტრებნადზორი“ ეპიდსაწინააღმდეგო ღონისძიებებს ატარებს, ყველა გამოვლენილი კონტაქტი კი სამედიცინო მეთვალყურეობის ქვეშ იმყოფება. ფომინიხის განცხადებით, ამ პირებს ამ ეტაპზე დაავადების ნიშნები არ აღენიშნებათ და მათი ლაბორატორიული კვლევების პასუხები უარყოფითია.

გამოცემა „ლიუდი ბაიკალას“ ცნობით, ირკუტსკში ერთდროულად რამდენიმე საავადმყოფო სამკვირიან კარანტინზე გადაიყვანეს. საუბარია N1, N3 და N10 საქალაქო კლინიკურ საავადმყოფოებზე, ასევე ივანო-მატრენინსკის საქალაქო საბავშვო კლინიკურ საავადმყოფოზე.

მედიის ინფორმაციით, ამ დაწესებულებებში მკაცრი შეზღუდვები მოქმედებს. პაციენტებთან ახლობლებს არ უშვებენ და მათ მხოლოდ ნივთებისა და პროდუქტების გადაცემა შეუძლიათ.

კარანტინი, სულ მცირე, ერთ სამშობიარო სახლშიც დაწესდა. ამის შესახებ „ლიუდი ბაიკალას“ ერთ-ერთი მშობიარის ოჯახის წევრებმა აცნობეს. მათი თქმით, ექიმებმა შეზღუდვის მიზეზად შავი ჭირი დაასახელეს. ქალის ქმარს პალატაში შესვლის უფლება არ მისცეს, მიუხედავად იმისა, რომ წყვილს ფასიანი პარტნიორული მშობიარობის კონტრაქტი ჰქონდა გაფორმებული.

„ლიუდი ბაიკალას“ წყარო ჯანდაცვის სფეროდან ამბობს, რომ ირკუტსკელი ექიმები უკვე ღიად საუბრობენ შავი ჭირის შესაძლო შემთხვევაზე. თუმცა, მისივე თქმით, საავადმყოფოებში შესულ ოფიციალურ დოკუმენტებში კონკრეტული დიაგნოზი მითითებული არ არის და შავი ჭირი დოკუმენტებში არ ფიგურირებს.

კვირას დღისით „როსპოტრებნადზორმა“ განაცხადა, რომ ირკუტსკისა და შელიხოვის სანიტარიულ-ეპიდემიოლოგიური ვითარება სტაბილურია.

უწყების ინფორმაციით, ირკუტსკის შავი ჭირის საწინააღმდეგო ინსტიტუტში პათოგენურ მიკროორგანიზმებთან მუშაობისას რაიმე ავარია არ დაფიქსირებულა. ამასთან, ინსტიტუტის ერთ თანამშრომელს დაუდგენელი ეტიოლოგიის პნევმონია აღმოაჩნდა. უწყებაში ასევე აცხადებენ, რომ ინსტიტუტის სხვა თანამშრომლებს ინფექციურ დაავადებებთან დაკავშირებით სამედიცინო დაწესებულებებისთვის არ მიუმართავთ.

2 ოქტომბერს გავრცელდა ინფორმაცია, რომ შელიხოვის საავადმყოფოში ახალგაზრდა პაციენტი გარდაიცვალა. არაოფიციალური მონაცემებით, გარდაცვალების მიზეზი შესაძლოა ფილტვის შავი ჭირი ყოფილიყო.

გავრცელებული ინფორმაციით, გარდაცვლილი ირკუტსკის შავი ჭირის საწინააღმდეგო ინსტიტუტის ლაბორანტი იყო. არაოფიციალური ცნობებით, 25 სექტემბერს მას ლაბორატორიაში დაავადების გამომწვევის შემცველი სინჯარა გაუტყდა.

„ლიუდი ბაიკალას“ წყაროები ასევე აცხადებენ, რომ 1 ოქტომბრიდან სასწრაფო დახმარების მანქანებს, რომლებითაც გარდაცვლილთან კონტაქტში მყოფი ადამიანები გამოკვლევებზე გადაჰყავთ, ფსბ-ს ეკიპაჟები აცილებენ.

ამავე წყაროების ინფორმაციით, იზოლაციაში დაახლოებით 200 ადამიანი იმყოფება.

ოფიციალური უწყებები ამ დროისთვის შავი ჭირის შემთხვევას არ ადასტურებენ.