ლატვიის საპარლამენტო არჩევნებში მოქმედი პრემიერ-მინისტრის, ანდრის კულბერგსის ბლოკი „გაერთიანებული სია“ ლიდერობს.

არჩევნები შაბათს, 3 ოქტომბერს გაიმართა. ხმების 90%-ზე მეტის დათვლის შემდეგ მმართველი ბლოკი ხმების 35%-ზე მეტს იღებს. არსებული მონაცემებით, ეს მას 100-ადგილიან სეიმში დაახლოებით 42 მანდატს მისცემს.

მიუხედავად „გაერთიანებული სიის“ მნიშვნელოვანი უპირატესობისა, მის ამჟამინდელ კოალიციურ პარტნიორებს პარლამენტში ნაკლები წარმომადგენლობა ექნებათ.

წინასწარი შედეგებით, მემარჯვენე „ეროვნული გაერთიანება“ 11 მანდატს მოიპოვებს, ხოლო მემარჯვენე-ცენტრისტული „ახალი ერთობა“ - შვიდს.

კულბერგსმა უკვე განაცხადა, რომ ახალი მთავრობის ჩამოყალიბებისთვის მზად არის და პირველ ეტაპზე მოლაპარაკებებს სწორედ ამ პარტიებთან გამართავს.

ანდრის კულბერგსი ლატვიის მთავრობას მიმდინარე წლის მაისში ჩაუდგა სათავეში. ბოლო თვეებში მისი პოპულარობა გაიზარდა. როგორც „გაერთიანებული სია“, ისე მმართველი კოალიციის სხვა პარტიები უკრაინის მხარდაჭერას და რუსეთის მიმართ მკაცრი პოლიტიკის გაგრძელებას ემხრობიან.

ახალ სეიმში კიდევ სამი პარტია მოხვდება.

მეორე ადგილზე პოპულისტური პარტია „ლატვია პირველ ადგილზე“ გავიდა, რომელსაც წინასწარი მონაცემებით 17 მანდატი ექნება. მესამე ადგილზეა „სუვერენული ხელისუფლება - ახალგაზრდა ლატვიელები“ 14 მანდატით.

ორივე პოლიტიკური ძალა, სხვა ამომრჩევლებთან ერთად, მნიშვნელოვანწილად რუსულენოვან ელექტორატზეც არის ორიენტირებული და უკრაინის მხარდაჭერისთვის გაწეულ ხარჯებს აკრიტიკებს.

მემარცხენე-ლიბერალური პარტია „პროგრესულები“ ცხრა ადგილს მიიღებს. ამ ეტაპზე მისი მომავალ მთავრობაში შესვლა ნაკლებად სავარაუდოდ განიხილება.

ლატვიის ცენტრალური საარჩევნო კომისიის თანახმად, შედეგები ამ ეტაპზე წინასწარია, საბოლოო ოფიციალური შედეგები კი მოგვიანებით დამტკიცდება.